пишува: ЕРОЛ ШАЌИРИ
Секоја чест на Алфа, барем насловот им е погоден како на никоја дебатна емисија на овие простори, „Заспиј ако можеш“, неколку минути и гарантирано нема да заспиеш цела вечер.
Денешен гостин Латас кој меѓу многуте небулози и невистини го кажа и следново: „Во време на Груевски Македонија на World Press Freedom Index беше на 34-то место, а денес власта се фали дека се подобрила за две места во однос на лани и сега е на 90-то место“. Сака Латас и компанија да кажат дека сега се медиумите заробени, дека сите новинари се „зомби“ како вели тој сем тие кои се на другата страна, која е таа друга страна не знам? Јас мислев дека новинарите треба да бидат на една страна единствено, на страната на вистината. Понатаму Латас како реторичко прашање рече „замислете Борјан Јовановски за време А1 да го уапсеа“? А зошто на пример требаше Борјан да биде уапсен, тоа не кажа. Заборави исто да каже дека на Борјан во време на Груевски со поворка дома пред семејството му испратија мртвачки венец (по грозоморно нешто се нема случено), заборави да каже дека во тоа време на Тричко џипот го дигнаа во воздух, на Ордановски му влагаа дома, Кежо го ставија во затвор, ја затворија највлијателната телевизија во тоа време А1, го уништија највлијателниот печатен медиум Утрински Весник, а и заборави да каже дека сите до еден новинар беа масовно прислушкувани.
Да се вратиме на индексот, нешто што исто така заборавија да го споменат. Точно дека 2009 бевме на 34-то место, но знаете на кое бевме во 2014 на пример, на 123-то, на сто дваесет и трето, пад од неверојатни 89 места во тоа време на Груевски кое го земаа за споредба. Во прилог ранкингот за последните 20 години, погледнете го патернот и сами проценете.
Што се однесува пак до моменталниот ранкинг, тој е исто така катастрофален но барем има тенденција на подобрување, ако тежнееме кон слободно новинарство како се декларираме мора да се вратиме некаде помеѓу 30-40 место, веднаш зад развиените светски демократии кои не верувам дека некогаш ќе ги стигнеме.
Да ти се згади и професија и се…
2003 – 52, 2004 – 49, 2005 – 43, 2006 – 46, 2007 – 36, 2008 – 42, 2009 – 34, 2010 – 68, 2011 – 94, 2012 – 94, 2013 116, 2014 – 123, 2015 – 117, 2016 – 118, 2017 – 111, 2018 – 109, 2019 – 95, 2020 – 92, 2021 – 90.
Текстот е личен став на авторот
