Министерката Радмила Шекеринска денес имаше разговор преку видео врска со нашиот медицински тим во Авганистан кој работи во состав на норвешкиот медицински контингент како дел од мисијата „Одлучна поддршка“.
Во разговорот, на кој присуствуваше и норвешкиот одбранбен аташе Егил Далтвеит, беа разменети информации за работењето на членовите на тимот и за целокупната мисија која се одвива низ блиска соработка со норвешки медицински стручњаци, а од страна на претставникот на нашиот тим специјалистот ортопед Атанас Поп-Стефанија беше направена виртуелна тура низ болницата.
„Се радувам што упеавме идејата за оваа соработка со Норвешка толку бргу да ја направиме реалност. Ви честитам на издржливоста и храброста, особено што мисијата се совпадна со периодот на пандемија а вие сте далеку од вашите семејства. Разговарав со норвешкиот колега за заедничко повлекување на целиот тим од Авганистан кога за тоа ќе дојде време, а фокусот ќе биде на безбедноста на сите припадници на мисијата. Вашето присуство во Авганистан е првиот чекор во изградбата на наш македонски медицински капацитет за вакви НАТО операции“, рече министерката Шекеринска и ја нагласи одличната соработка со Кралството Норвешка која токму во денешниов ден резултира со донација од 100 респиратори.
Министерката уште еднаш ја искажа својата осуда што мисијата на нашиот воено-медицински тим беше мета на политички подметнувања и ширење лаги за членовите на тимот, и го истакна ставот дека е непримерно Армијата и здравството да се користат во политички пресметки. „Можете да бидете горди, вашата работа во Авганистан е од голема помош за нашата држава и за здравството“, порача министерката Шекеринска.
Специјалистот-ортопед Поп-Стефанија рече дека тимот работи во одлични услови, се чувствуваат добро и нема никакви проблеми. „Наидовме на одличен прием кај нашите норвешки колеги, тие одлично се грижат за нас, и среќни сме што со нашата работа стекнуваме драгоцено искуство и учествуваме во изградба на воено-медицински капацитети на нашата држава“, рече тој.
Благодарност од Кабул до целиот македонски тим упати и командантот на норвешката теренска болница потполковник Бент Андерс Салберг кој беше дел од видео разговорот. Тој ја истакна посветеноста на македонскиот тим и рече дека е задоволство да се работи со него. Одбранбениот аташе потполковник Егил Далтвеит, од Скопје им посака успешна работа на членовите на норвешката и на македонската мисија и рече дека следната средба со нашиот тим ќе биде во Норвешка при враќањето од Авганистан.
