Со измените на буџетската Програма од областа на екологијата и енергетската ефикасност, општина Карпош на 56-та седница одлучи повеќекратно да ги зголеми средствата за зелени површини, хортикултура, јавна хигиена, обновување и одржување на урбана опрема, реквизити за детски и спортски игралишта.
– За подигнување нови тревни површини, садење дрвја и украсни растенија, како и монтирање системи за наводнување насочени се 13.000.000 денари наместо планиранте 6.000.000, за јавна чистота и хигиена 51.800.000 денари наместо планираните 43.800.000, за нова урбана опрема (клупи и корпи за отпадоци) предвидени се 9.100.000 денари наместо планираните 6.000.000. За одржување на постоечката урбана опрема, како и за сервисирање на реквизитите на детските игралишта, спортски терени и фонтаните (на платоата) предвидени се 23.000.0000 денари наместо претходно планираните 14.000.000 денари, информира Општина Карпош.
Соопшти дека ги намалила и планираните средства за новогодишно украсување, од 2.000.000 на 700.000 денари.
– Основната цел на локалната самоуправа е уште повеќе да се зголеми зеленилото во Карпош. Акцентот се става на меѓублоковското зеленило, зеленилото меѓу зградите кое е најблиску до граѓаните. Исто така, вложуваме во уредување на овие зони со содржини за најмладите, како и во урбана опрема за повозрасните сограѓани. Хуманизацијата на јавниот простор подразбира креирање на површини кои одговараат на потребите на сите граѓани, соопштува Општината.
извор: МИА
