Сопругата на претседателот на државата, Елизабета Ѓоргиевска, по повод големиот муслимански празник Рамазан бајрам, денеска ја посети Клиниката за инфективни болести на ЈЗУ Општа болница Куманово.
Ѓоргиевска беше информирана за тековните активности и за предизвиците со коишто се соочуваат здравствените работници во оваа клиника. Во таа насока ја нагласи нивната пожртвуваност, посветеност и висок професионализам, особено имајќи ги предвид сложените услови за работа наметнати од пандемијата на Ковид-19, истакнувајќи ја, во тој контекст, неопходноста од одговорно и свесно однесување, на сите граѓани, за побрзо надминување на глобалната здравствена криза.
За време на посетата на болницата, сопругата на претседателот се сретна и со здравствениот персонал ангажиран во „Зелената зона“ на Модуларниот ковид центар, кои што ја запознаа со капацитетите и со интензитетот на нивната работа во услови на ковид-19. Ѓоргиевска изрази увереност дека со намалувањето на бројот на заболени, за брзо време ќе се воспостави и нивното нормално функционирање.
Во духот на традицијата на празникот Рамазан бајрам, сопругата на претседателот, Ѓоргиевска, со домашно подготвена баклава, го почести дежурниот медицински тим на Клиниката за инфективни болести и во трите ковид центри на Општата болница Куманово.
