Членовите на владиниот кабинет кои биле претходно во граѓанските организации се едни од поуспешните министри Критиката е здрава работа и значи дека имаме можност секој да има слобода да си го изрази својот став. Уште подобро е кога тие критики се слушнати од адресите до кои се упатени и се на некој начин земени предвид, вели Фани Каранфилова-Пановска, извршен директор на Фондацијата Отворено општество по повод три децении работа во Западен Балкан.
-Тоа што интелектуалните критички ја опсервираат работата на оваа власт е добро и здраво. Тоа е доказ дека овде секој може да си го каже својот став без да претрпи последици. Меѓу бројните критичари е и нашиот поранешен претседател Владимир Милчин, со кој релациите ни се одлични, но тој откако заврши на функцијата во Фондацијата си се посвети на свјата режисерска работа повеќе и веројатно работни кои и претходно го интересирале, но не можел толку да им се пoсвети, појаснува таа.
Таа појаснува дека многумина во судската и извршната власт биле соработници на Фондацијата, а сега добро познати актери во општествениот живот.
– Сите членови на кабинетот на сегашнава влада кои на некој начин произлегуваат или имаат свое минато со работа во граѓански организации дефинитивно имаат поглем сенс за тоа зошто е важно, колку е важно и како треба да се вклучи граѓанското општество во процесите на креирање политики. Нивната предност е тоа што, покрај тоа што сите се компетентни во областите во ресорите кои се избрани да ги водат, имаат увид во милјето помеѓу граѓанските организации, вели Каранфилова-Пановска.
Таа појаснува дека токму овие професионалци знаат како граѓанското општество пулсира и дише и тоа е предност пред сите можеби останати, за да бидат посензитивни и можеби дури и со поголемо знаење за тоа во кој момент треба организациите да бидат консултирани и како и зошто нивните препораки за одредни пракси и политики, да ги земат предвид.
– Членовите на владиниот кабинет кои биле претходно во граѓанските организации се едни од поуспешните министри, барем досега. Се разбира, будно следиме сѐ што се случува, но нашата главна одредница со која се занимаваме изминатите години и ќе се занимаваме во иднина, е да помогнеме таа неурамнотеженост да се избалансира најмногу кога станува збор за економско-социјалната нерамноправност на граѓаните, вели таа.
Каранфилова-Пановски посочи дека пред сѐ мисли на нерамноправноста во пристапот до образование, пристапот до здравствени услуги, заедниците кои се економско и социјално депресирани и на кои им треба повеќе помош отколку на кој било друг. Тука во фокусот се и Ромите и жените и децата и тоа од овој аспект до пристапот со основните услуги поврзани со основните човекови права.
– Ќе се фокусираме на тоа како работат и управуваат институциите со ресорите коишто им се доделени, од аспект на тоа дали тоа се прави по принципите на добро владеење и справување со корупција. Тука ќе делуваме многу и ќе продолжиме да ги поддржуваме напорите на граѓанските организации да се залагаат за оние круцијални вредности на отвореното општество и понатаму, но пред се да бидат будни и да ги следат политиките на оваа власт и да бидат гласни кога некои од тие политики застрануваат, вели таа.
