Иако на почетокот процесот со онлајн настава беше критикуван од опозицијата, како и од некои родители, сепак, резултатите од истражувањето на УНИЦЕФ покажуваат голема успешност на наставата преку интернет.
Истражувањето потврдило дека постои значителен напредок во организација и спроведување на онлајн учењето, а при тоа се постигнале и одлични резултати. Сите учесници во образовниот процес (директори, наставници и ученици) оценуваат дека наставата на далечина е поорганизирана оваа учебна 2020/21 година споредено со второто полугодие од 2019/20. Клучни промени се: доследна организација на наставата според распоред на часови и користењето на платформа за видео-конференциски повик за реализација на предавањата и часовите. Со ова се потврдува ставот на Владата дека уште од самиот почеток на онлајн наставата се вложувале напори за нејзино доследно применување, а уште подобро е тоа што во оваа учебна година биле надминати некои слабости карактеристични за ланската учебна година. На стартот од онлајн наставата, дел од директорите и наставниците беа скептични во процесот со учење од далечина, но како одминуваше времето и тие се уверија дека владиниот концепт е спроведлив и дава резултати.
Токму затоа, според истражувањето и директорите и наставниците во просек дале повисоки оценки за МОН и надлежните органи во поглед на јасноста на насоките кои ги добиваат за организација на наставата на далечина, споредено со претходната учебна година. Дури и учениците, кои на почетокот реагираа дека немаат јасен распоред на часовите и дека наставата делумно се одвива, сепак на крајот и тие потврдиле дека наставата се одвивала непречено, според распоредот на часови и дека се поминало во најдобар ред. Двојно се намалил и процентот на родители кои сметаат дека учењето на далечина не е ефективно. Минатата година 49% одговориле дека учењето на далечина не е ефективно, а оваа учебна година само 26% го делат овој став.
Речиси половина од родителите чии деца имале настава на далечина (48%) го оценуваат работењето на наставниците со одличен пет, а дополнителни 26% со многу добар четири. Сите овие бројки потврдуваат дека наставата била добро организирана и спроведена и дека учениците можеле да се стекнат со потребните знаења. Со тоа се демантираат сите обиди на опозицијата и одредени групи неосновано да ја критикуваат онлајн наставата. МОН е фокусирано и на дигитализацијата на образовниот процес и на темелни реформи во наставната програма. И за тој процес постојат одредени критики, како што имаше на почетокот за онлајн наставата, но време е конечно да се спроведе она кое што 30 години се зборува и се става само на хартија, а никогаш никој не се дрзна да го оствари.
Д. Е.
