На дваесетина дена пред новата учебна година, Министерството за образование и наука соопшти дека ќе почне во редовниот термин, 1 септември, и дека се интензивни подготовките за стартот во услови на пандемија преку пристап со кој ќе се обезбеди непречено одвивање на наставата, но и заштита на јавното здравје. Додадоа дека досега се вакцинирани околу 60 % од наставниот кадар.
Државната изборна комисија денеска сооопшти дека постапува согласно Законот за завршување на текот на постапката на јавната набавка на фингерпринт апаратите.
Рамковниот договор е најуспешниот меѓународно посредуван договор на просторите на поранешна Југославија, изјави министерот за надворешни работи Бујар Османи на денешната прес-конференција, одговарајќи на новинарско прашање. Ако ги споредиме сите мировни договори во регионот во последните 20-30 години, единствениот договор кој се исполни во целост, во својот легислативен дел, односно во нормативниот дел, во делот на законите кои произлегуваат од самиот договор, истакна тој.
Преку НИКС (Next generation incident command) системот во реално време ги добиваме сите податоци и потоа ги дигитализираме. НИКС системот служи за просторно прикажување податоци во реално време, информира денеска директорот на Центарот за управување со кризи Стојанче Ангелов на прес-конференцијата на која беше промовиран НИКС системот.
За крај на овој вечерен преглед, да споделиме и една сатирична објава на нашиот колумнист, Бранко Тричковски: Ако и од трета мајка Бугарија остане без влада, мандатот за управување со земјата ќе го добие нацијата која е најблиска до бугарската, народот со заедничка или иста историја со бугарската, со речиси ист јазик итн, односно Македонија…
М. Миткоска
