Градоначалникот на Скопје, Петре Шилегов донесе решение за разрешување на директорката на гимназијата „Никола Карев“ во Скопје, по објавената снимка каде директорката Горица Илиовска на насобраните ученици во холот на гимназијата им се заканува со последици врз учениците, доколку тие излезат на протест против загадувањето и глобалното затоплување.
– Градот Скопје им укажува на сите раководители на своите институции дека во својата секојдневна работа треба да ги исполнуваат принципите според кои се избрани како почитувањето на правото на слободно мислење, правото на протест и демократскиот натпревар на идеи. Оваа градска администрација стои зад сечие право на протест и слободно мислење и во неа нема место за закани кон средношколците и нивното демократско право на собир и протест – стои во соопштението.
– Правото на здрава животна средина е неприкосновено право, исто како и правото да се протестира за истото. Битката против климатските промени и за чистиот воздух мора да биде заедничка, на институциите, но и на граѓаните. И не само декларативна, туку и конкретна. Институциите да предначат, а граѓаните со свој пример да учествуваат во неа. Само така, таа битка може да ја добиеме. Сите заедно. – додава Шилегов.
