Политичките партии до недела ги одложија јавните активности поврзани со локалните избори 2021 закажани за 17 октомври, поради деновите на жалост по пожарот на модуларната Ковид болница во Тетово во која загинаа 14 лица. Сепак, партиите и независните кандидати кои сакаат да учествуваат на изборите мораат да ги запазат роковите предвидени од Државната изборна комисија (ДИК). Синоќа на полноќ заврши јавниот увид во Избирачкиот список, а утре на полноќ истекува рокот за поднесување кандидатури за изборите до Општинските изборни комисии.
Епидемиолошката состојба со Ковид-19 и вчера слична на претходните денови. Бројот на починати останува околу 30 дневно, но има мал пад на бројот на новозаразени. Вчера беа регистрирани 256 случаи на Ковид-19 од 2.778 тестирања или околу девет проценти, што е за еден процент помалку од изминатите денови. Меѓу 31 починат за претходното деноноќие, повторно евидентирано младо лице.
Министерот за здравство д-р Венко Филипче, изрази длабоко жалење до семејствата на починатите во катастрофалниот пожар кој избувна во модуларната болница во Тетово. Длабоко сочувство до семејствата на загинатите во овој трагичен настан, повикувам на целосна независна истрага која ќе ги утврди фактите, истакна тој. Истрагата за случајот е во тек, а министерот нагласи дека никој нема да биде изземен од одговорност.
Централен регистар, односно регионалните регистрациони канцеларии в недела, понеделник, вторник и во среда ќе работат со дежурства и продолжено работно време поради роковите за поднесување на пријави за претстојните локални избори.
Деновите на колективна жалост и тага, кога сите сочувствуваат со семејствата на жртвите од трагичниот пожар во Тетово, не се денови за политиканство, велат од СДСМ. Грдото, некрофилно ВМРО-ДПМНЕ нема основно чувство за човечност ниту пак за сериозност. Тоа е ВМРО-ДПМНЕ предводена од Христијан Мицкоски, ништо не им е свето, ниту важно
М. М.
