Републичкиот совет за безбедност на сообраќајот на патиштата (РСБСП) најави дека во наредните седум дена ќе реализира низа активности за промоција и поддршка на алтернативните форми на мобилност со посебен акцент на поддршка на велосипедизмот. Активностите се во рамки на кампањата што на иницијатива на Европската комисија секоја година се спроведува од 16 до 22 септември, со цел промоција на алтернативни форми на мобилност како што е пешачењето, велосипедизмот.
Возењето на велосипед, или велосипедизмот, како алтернативно превозно средство носи со себе многубројни бенефити,- персонални, економски, социјални, еколошки и многу други. Како резултат на сите овие бенефити, луѓето сѐ повеќе ги заменуваат своите автомобили со велосипеди како начин на мобилност и транзитирање до посакуваната дестинација. Истражувањата покажуваат дека во изминатата деценија бројот на луѓе кои патуваат до своето работно место со велосипед, континуирано се зголемува од ден на ден и позитивно е оваа појава да продолжи и во иднина.
-Прво и пред сѐ, треба да се потенцираат здравствените бенефити од возењето велосипед. Општо познато е дека луѓето коишто инкорпорираат физички активности во нивниот дневен живот, генерално живеат подолг и поздрав живот од останатите. Велосипедизмот како физичка активност помага во градењето на мускулот, слабеење, спуштање на високиот крвен притисок и зајакнување на срцето. Исто така, возењето велосипед, докажано помага при намалување на стресот, и подобрување на сонот, информираат од РСБСП.
Велосипедот како превозно средство, укажуваат, не троши фосилно гориво, и со тоа нивото на издувни гасови во воздухот се намалува и квалитетот на воздухот расте. Што значи дека колку повеќе автомобили отстраниме од улица, и ги замениме со велосипеди, толку подобро за сите нас, за нашето здравје, и околината во којашто живееме. Користењето велосипед како превозно средство ви овозможува да ги избегнете метежите по улиците и да патувате безбедно и да пристигнете до вашата дестинација побрзо, и со помалку нервози. Патувањето со велосипед исто така го елиминира еден од најголемите проблеми на патувањето со автомобил, а тоа се паркинг местата. Возењето велосипед може да го спаси светот и да го направи Вашиот живот подобар! Одважи се, вози велосипед, советуваат од РСБСП.
