Oд денес на полноќ официјално започна изборната кампања, дел од кандидатите своите програми ги споделуваат на социјалните мрежни. Кои се забелешките на независните кандидати во изборната кампања? Не се знае до кога ВМРО-ДПМНЕ ќе ја манипулираат јавноста на сметка на Шилегов. Каква е политичката состојба во Бугарија? Што се случува кога ќе се искомбинираат „АстраЗенека“ и „Спутник Лајт“?
ПОЛИТИКА, ЕКОНОМИЈА И ИЗБОРИ
Бектеши очекува олабавување на рестриктивните мерки во претстојниот, зимски период доколку граѓаните и угостителските објекти ги почитуваат протоколите. Тој не прецизира дали ќе има олеснувања или евентуални укинувања, но уште еднаш повтори дека Владата се држи до препораките на Комиисјата за заразни болести. Во однос на туристичката сезона, истакна дека благодарение на владините мерки, била доста успешна.
Заев на денешниот прв ден од почетокот на кампањата за претстојните локални избори вети дека како партија и коалиција ќе водат позитивна кампања која ќе биде насочена кон она што било направено досега, но и кон идните планови за поддршка на локалните самоуправи и за поголем локален економски развој.
СДСМ ја нуди најдобрата понуда на домашната политичка сцена. Јасна идеја и јасен план за развојот за секој град, за секое село, за целата држава, информираат од партијата на првиот ден од кампањата за локалните избори. Од СДСМ истакнаа дека наредните денови ќе ја посетат секоја општина и секое населено место.
Нова пратка на уреди за биометриска идентификација на гласачите пристигна во земјава. За првпат ќе се користат на претстојните локални избори со цел да се зголеми довербата во изборниот процес и да се елиминираат досегашните сомневања во изборните резултати.
Во првото издание на „Изборен рапорт“, ЦИВИЛ им посака успешна и достоинствена кампања на сите кандидатки и кандидати, ги промовираше новите видео содржини и пренесе низа забелешки од независните кандидатки и кандидатки за функции во локалната власт на претстојните избори. „Изборен рапорт“ ќе се емитува во живо, в понеделник, среда и петок, со почеток во 11 часот од прес центарот на ЦИВИЛ.
Се урна уште една конструкција на ВМРО-ДПМНЕ. Со денови вртеа една иста лага во обид да ја манипулираат јавноста за наводни коруптивни скандали поврзани со градоначалникот Петре Шилегов и директорот на ЈП Водовод и канализација Душко Весковски, велат од СДСМ.
Видео спотот „Гласаме!“ е атрактивно, уметничко видео посветено на, како што тоа го нарекуваат креатор(к)ите, гласачката свесност. Првата реакција на тимот на ЦИВИЛ и Редакцијата ЦИВИЛ МЕДИА по добивањето на финалната верзија од овој динамичен уметнички спот беше:
„Ова е неопходна видео лектира за секој гласач во светот!“
РЕПУБЛИКА, РЕГИОН И СВЕТ
Градоначалникот на Скопје Петре Шилегов во својата прва прес-конференција од изборната кампања изрази уверување дека постигната е целта поставена кога во 2017 ја доби довербата од граѓаните да се смени курсот во кој се движеше градот предводен од ВМРО-ДПМНЕ. Истакна дека започнати се проекти кои ќе решат проблеми за наредните 50 години.
Бугарскиот претседател Румен Радев го повика лидерот на ГЕРБ, Бојко Борисов, да се кандидира за шеф на државата. Радев смета дека „крајно време е Борисов да не ја користи својата партија како штит и да ја одбрани нејзината чест со кандидирање за претседател“.
Децата ширум светот ќе доживеат повеќе горештини, поплави и суши во животот отколку нивните баби и дедовци, се наведува во студијата на организацијата Спасете ги децата (Save The Children).
Мала клиничка студија за комбинирана употреба на вакцината на Астра Зенека и доза Спутник Лајт против Ковид-19 покажа силен раст на антитела кај повеќето тестирани лица, објави денеска Рускиот фонд за директни инвестиции (РДИФ).
М. М.
