Премиерот на Бугарија, Стефан Јанев, изјави за БНТ дека во однос на Северна Македонија, Владата во Софија има намера да го продолжи курсот што досега го водеше, односно да го заштити бугарскиот национален интерес на најдобар можен начин.
Според Јанев, како што јави дописникот на МИА од Софија, бугарскиот национален интерес е поврзан и со интересот на другите нации во ЕУ.
-Но, не треба да се дозволи спорот меѓу две соседни земји да се пренесе во ЕУ. Бугарија мора да се фокусира на дијалог и постојан контакт, со властите во Република Северна Македонија да се бара решение во име на нашата заедничка иднина, коментираше премиерот Стефан Јанев, додавајќи дека треба „да не се закопаме во минатото, туку да бараме решение во иднината.”
Бугарските тврдења, нагласува, се слушнати доволно добро и од македонска страна и од нејзините европски партнери.
-Бугарија сака нормален дијалог, сака да го запре јазикот на омразата, како и воспитувањето за омраза кон Бугарија. Сака и да го запре лошиот однос кон луѓето со бугарска самосвест во Северна Македонија. Така овие работи ќе се решат и ќе се најде вистинската формула, коментира Јанев, додавајќи дека се надева дека ова ќе се случи во блиска иднина.
Според него, по крајот на октомври и ноември, кога има политички избори во Македонија и Бугарија, дијалогот ќе добие нова смисла.
-Нема да има промена на бугарската позиција, бидејќи тоа го постави Народното собрание на Бугарија, рече премиерот Стефан Јанев и додаде дека земјата нема да биде уценувана./ МИА/.
