Министерот за транспорт и врски Горан Сугарески, на денешната прес-конференција, говореше за досегашната реализација на капиталните инвестиции и потенцираше дека има добра динамика на реализација на капиталните проекти кои се во рамките на ресорот Транспорт и врски, и на јавните претпријатија кои се составен дел од овој ресор.
Тој додаде дека исто така има добра динамика на реализација и на капиталните проекти во сите сегменти кои ги покрива државниот буџет и дополнително инвестициите во патната инфраструктура кои се надвор од буџетот, потенцирајќи дека и таму реализацијата е значително голема.
Сугарески потоа ги наведе конкретните бројки и проценти, заклучно со месец септември:
„Во делот на гасификација за 2019 година предвидивме 1 милијарда и 557 милиони денари и до сега реализирани се 71%, или преку една милијарда и сто милиони денари од планираните инвестиции.“
Министерот Сугарески истакна дека оваа година е завршен гасоводот Штип-Неготино, а во тек е изградба на гасоводот Неготино-Прилеп-Битола и гасоводот Скопје-Тетово-Гостивар, на кој се работи непречено. Овие две магистрали, како што потенцираше министерот, се очекува да бидат завршени следната година. а до крај на оваа година, се очекува целосна реализација на предвидените средства.
„Во делот на станбената изградба, или изградбата на „социјалните станови“, бележиме 100% реализација. Отпочнавме со изградба на вкупно 110 социјални станови во Пробиштип и Неготино. Во соработка со АД за станбен и деловен простор оваа година ќе започнеме да градиме станови во Бутел, во Гевгелија, Виница, Пехчево, Свети Николе, Дебар, Велес, Скопје“ додаде Сугарески.
„Во делот на комуналната сфера, во моментов, активно се работи на 27 проекти во изградба и реконструкција во водоводи и канализации, во вредност од околу 10 милиони евра. Овие пари се обезбедени преку кредитната линија на ЕИБ. Исто така преку оваа кредитна линија во фаза на тендерирање имаме уште 7 проекти кои ќе почнат да се работат оваа година“ истакна Сугарески.
За доизградба на канализациони и водоводни линии во Кавадарци и Радовиш, министерот Горан Сугарески, потенцира дека активно се работи во соработка со КФВ Банката, инвестиција вредна повеќе од 1.5 милиони евра.
Тој понатаму додаде дека преку буџетот на Министерството за транспорт и врски, е отпочната изградба на водовод во ИЗ Визбегово едно од најголемите барања на инвеститорите во зоната, во вредност од 1.8 милиони евра и дека во подготовка е тендерската постапка и проектот за изградба на канализација исто така во ИЗ Визбегово, проект вреден преку 7 милиони евра.
За инвестициите во патната инфраструктура, Министерот Сугарески вели дека се значително големи, иако тие не влегуваат во државниот буџет и дека во сегментот патишта, реализирани се 59 % од планираните, или преку 120 милиони евра.
„ЈП за државни патишта активно работи на двесетина патишта. Овој месец, односно октомври ќе отпочнат да се рехабилитираат уште десетина регионални патни правци, а до крајот на годината уште десетина ќе започнат со реконструкција и рехабилитација.
Генерално во моментот се работи на околу 420 километри патишта низ државата, или вкупна инвестиција од преку 800 милиони евра.“ изјави Сугарески за реализацијата во делот од патната инфраструктура.
Во делот на железницата, Министерот истакна дека во првиот квартал изградбата на делницата од Куманово до Бељаковце се одвива со послаба реализација. Но, таквата состојба, вели тој, се смени со потпишување на анекс на договорот и во моментов имаме засилена динамика. Вкупните градежни работи на оваа делница се околу 55%.
„Целосно се завршени градежните работи и на пругата од Битола до Кременица, а во меѓувреме остана да се инсталира оптичкиот кабел. Активно се преговара со грчкото министерство за изградба и на „one stop“ или една заедничка железничка станица каде ќе има само едно застанување на сите возови.
Тоа е генерално крупната слика во реализација на капиталните инвестиции, пак ќе потенцирам – што ја работи ресорот Транспорт заедно со јавните претпријатија.“ заврши Горан Сугаревски, Министер за транспорт и врски.
Ј.Ѓ.
Discussion about this post