Министерот за транспорт и врски Благој Бочварски преку објава на Фејсбук со цел, како што нагласува, да се избегнат шпекулации, потенцира и прецизира неколу информации околу лиценците на „Беса Транс“ и начинот како превозникот ја минувал границата.
Објавата ја пренесуваме во целост.
„Заради точно информирање би сакал да ги потенцирам следните информации. Превозникот Беса Транс поседувал две лиценци за работа тоа:
– Лиценца за слободен превоз на патници во меѓународниот сообраќај со број 007017. За оваа лиценца веќе донесов решение да му биде одземена заради злоупотребата што ја правел Превозникот.
– Истата компанија поседувала лиценца за линиски превоз на патници во внатрешниот сообраќај со број 8528 и оваа лиценца е истечена во месец Октомври 2021 година и истата е неважечка.
– Овие лиценци се однесуваат на правното лице Беса Транс БТБ, како фирма, а не на превозни средства.
Во однос на поседување на изводите од лиценци за автобуси за слободен превоз на патници во меѓународниот сообраќај, превозникот Беса Транс БТБ, поседувал изводи од линцеци за 4 автобуси.
Веднаш ќе потенцирам дека опожарениот автобус со регистарски таблици СК0284 БА кој учествуваше во сообраќајната несреќа во Република Бугарија, не е пријавен од сопственикот во единствената електронска база на податоци на Министерството, за истиот автобус не поседувал извод од лицнеца а за превозот на патници користел неважечки извод кој се однесувал за друг автобус.
Согласно Законот за превоз во патниот сообраќај член 11 став 1, се вели дека превозникот може да започне да врши превоз на патници во внатрешниот и меѓународниот патен сообраќај, откако ќе добие лиценца за фирмата и извод од лиценца за моторно возило.
Превозникот ниту го пријавил, ниту побарал од Министерството за транспорт и врски извод од лиценца за опожарениот автобус и поради тоа истиот не е евидентиран во единствената база на податоци.
Друга работа што е многу важна а со која се шпекулира во јавноста е начинот како превозникот Беса Транс БТБ ја минувал границата.
Изводот од лиценца со број 22679 што се јавува во електронскиот систем на Царинската управа а кој бил користен за опожарениот автобус при излез од земјата, е број на извод од лиценца на друго возило со други регистарски таблички, исто така сопственост на превозникот Беса Транс БТБ.
Тоа јасно упатува дека превозникот вршел злоупотреба на извод од лиценца од друго возило а во друг наврат ја прикажувал и лиценцата од фирмата и со тоа свесно ги прекршувал одредбите од Законот за превоз во патниот сообраќај.
Поради тоа, веќе информиравме дека Министерството за транспорт и врски ја одзеде лиценцата за вршење на дејност на превозникот Беса Транс БТБ.
На крај сакам да информирам дека по барање на Обвинителството, Министерството за транспорт и врски веќе ја предаде целосната документација за превозникот Беса Транс БТБ и во наредниот период ќе постапуваме според барањата и потребите на Обвинителството.
Во однос на надлежностите на Министерството, веќе спомнав дека постапивме согласно Законот за превоз во патниот сообраќај и донесовме решение за одземање на лиценцата за работа и неможност за вршење на дејност. Превозникот има право на жалба, но жалбата не го одлага решението што значи дека тој има обврска да ја депонира лиценцата и изводите од лиценци назад во Министерството.“, пишува во објавата министерот Бочварски.
