Францускиот претседател Емануел Макрон денеска и посака на нацијата среќен Божиќ, но ги предупреди семејствата да преземат мерки на претпазливост да не се заразат со коронавирусот.
„Ајде да се грижиме еден за друг“, напиша тој во твит, повикувајќи ги луѓето да почитуваат упатства за социјално дистанцирање и да направат тест дома пред да присуствуваат на собири. Секој со симптоми треба да ги изолира и предупреди другите, додаде тој.
Макрон, исто така, им се заблагодари на здравствените работници. Во Франција, бројот на инфекции со коронавирус драстично се зголеми во последните недели. Неодамна, седумдневниот просек на случаи на 100.000 луѓе изнесуваше околу 550.
Портпаролот на француската влада Габриел Атал ја нарече ситуацијата критична и предупреди дека позаразната варијанта на вирусот Омикрон носи со себе нов бран. Тој повика и на претпазливост за време на празниците. Нема официјални ограничувања за приватни собири во Франција.
извор: МИА
