Висок украински функционер за сајбер безбедност во средата (16 февруари) изјави дека бил извршен сајбер напад врз веб-страниците на Министерството за одбрана и армијата на Украина, како и врз интерфејсите на двете најголеми банки во земјата во вторникот (15 февруари). Според украинските владини извори, се работи за најголемиот напад од ваков вид во историјата на земјата, објави Њујорк Тајмс.
„Имаше траги на странски разузнавачки служби“ – се вели во изјавата.
Министерот за дигитална трансформација на Украина, Михаил Федоров, изјави дека „векторите на напади биле организирани од различни земји“.
„Јасно е дека тој беше однапред подготвен, а клучната цел на овој напад е да се дестабилизира, да сее паника, да се направи сè за да се создаде хаос во активностите на Украинците“, рече тој на прес-конференција во Киев.
Овие сознанија се совпаѓаат со „делумно повлекување“ на руските воени сили кои се распоредени на северните, источните и јужните граници на Украина, сила што претседателот Бајден во вторникот ја процени на околу 150.000 војници.
Официјалните претставници на Украина се загрижени дека Русија може да се обиде да ја дестабилизира земјата на други начини, вклучително и преку сајбер војна.
Веб-страниците и банките нападнати во вторникот вечерта беа погодени од силен DDoS напад, при што хакерите ги преплавуваат серверите што хостираат веб-локација додека таа не се преоптовари и не се исклучи.
Додека е во тек целосна истрага, сите знаци упатуваа на Русија, рече Илја Витјук, шеф на Одделот за сајбер безбедност на Украинската агенција за разузнавање.
„Денес знаеме дека, за жал, единствената земја што е заинтересирана за вакви напади врз нашата земја, особено во позадината на масовна паника поради можна воена инвазија е, за жал, Руската Федерација“, рече Витјук за време на прес-конференцијата.
Тој додаде дека нападот најверојатно чинел милиони долари за да се изврши, што е далеку од можностите на поединечни хакери или хакерски групи.
„Таквите напади обично ги вршат земји. Ваквите напади имаат потреба од инфраструктура“ – изјави Витјук.
Москва негираше одговорност за нападот DDoS.
„Не знаеме ништо за тоа, но не сме изненадени што Украина продолжува да ја обвинува Русија за сè. Русија нема никаква врска со какви било DDoS напади“ – изјави портпаролот на Кремљ, Дмитриј С. Песков за новинарите.
DDoS нападот започна во вторникот (15 февруари) и траеше повеќе од 24 часа, соопшти украинското Министерство за одбрана. Украинските власти за сајбер безбедност „успеаја значително да го намалат нивото на штетен сообраќај“ – изјави Виктор Жора од Центарот за стратешки комуникации и информациска безбедност, владина агенција основана за да се спротивстави на руските дезинформации.