Украина ја осудува одлуката на Руската Федерација за признавање на „независноста“ на создадените од нејзина страна квази-ентитети на привремено окупираните територии на Украина – таканаречените „Луганска Народна Република“ и „Доњецка Народна Република“, пишува во изјавата на Министерството за надворешни работи на Украина.
„Со таквите дејствија, руската страна грубо ги прекрши основите на меѓународното право, Повелбата на ООН, ги наруши суверенитетот и територијалниот интегритет на Украина во рамки на нејзините меѓународно признати граници“.
Одлуката на Русија да ги признае таканаречените „Луганска Народна Република“ и „ Доњецка Народна Република “ нема да има никакви правни последици. Оваа одлука нагло ја зголемува ескалацијата на ситуацијата и може да значи еднострано повлекување на Руската Федерација од договорите од Минск.
Украинската страна ги разбира намерите на Русија и нејзината желба да ја испровоцира Украина. Ги земаме предвид сите ризици и не подлегнуваме на провокации, остануваме посветени на политичко – дипломатско решавање на руско-украинскиот вооружен конфликт“, пишува во изјавата на МНР на Украина.
Од Министерството за надворешни работи на Украина изјавија дека според насоките на Претседателот на Украина, Володимир Зеленски, украинската дипломатија во моментов го користи целиот свој дипломатски арсенал за да спречи избувнување на вооружен конфликт.
„Министерот за надворешни работи на Украина Дмитро Кулеба е во постојан контакт со своите колеги со цел координирање на дипломатските напори и преземање на мерки за одржување седници на меѓународни органи, самити, добивање одбранбена помош и примена на строги санкции против Русија.
Понатамошните одлуки и чекори на Руската Федерација во голема мера зависат од реакцијата на светот на денешните настани. Затоа, инсистираме на примена на строги санкции против Русија со цел да се испрати јасен сигнал за недозволивоста на натамошна ескалација. Дојде време за дејствување со цел да се стави крај на агресијата на Русија и да се обноват мирот и стабилноста во Европа“, пишува во изјавата.
