Уште една тешка ноќ за Украина и за нејзиниот главен град Киев. Како што кажа и украинската амбасадорка во нејзиниот брифинг, утрината в сабота на 26 февруари, „злото, обично излегува навечер“, артилериските напади на Киев се интензивираа со паѓањето на мракот. Репортерите на Си-Ен-Ен јавуваат за силни експлозии и дека руските сили му се приближуваат на градот од сите страни.
Извештаите од фронтот јавуваат и за жесток отпор од страна на украинската полиција, војска и доброволците. Во моментов се одвиваат жестоки улични борби во периферијата на Киев.
Руските агресори имаат неспоредливо поголеми предизвици отколку што планирале, според Пентагон и низа други релевантни извори во светот. Освен жестокиот сенароден отпор на Украинците, руската наезда ја забавија и недостатокот на гориво за воената механизација и храна за војниците.
Претходни важни вести за војната во Украина
Германската влада одобри снабдување на Украина со оружје
Германската влада ја одобри одлуката за снабдување на Украина со 1.000 парчиња противтенковско оружје и 500 проектили земја-воздух Стингер од залихите на Бундесверот за поддршка на вооружените сили на Украина. Ова го изјави германскиот канцелар Олаф Шолц, јави дописникот на Укринформ.
Бајден: Две опции – Трета светска војна или санкции
Американскиот претседател Џо Бајден во интервју за Брајан Тајлер Коен, објавено в сабота попладне, 26 февруари, во врска со војната во Украина, изјави дека светот е исправен пред избор – трета светска војна или санкции.
„Има две опции. Прва, Трета светска војна, да се оди во војна со Русија, физички. Или втора, земјата која дејствува толку спротивно на меѓународното право, да заврши така што ќе ја плати цената за тоа.“
