Руските вооружени сили продолжуваат да нанесуваат ракетни и бомбашки напади врз Кијив, Мариупол, Волноваха, Суми, Миколајив, Харкив и други населени места, што го оневозможува безбедното заминување на хуманитарните конвои со украински и странски државјани, како и испорака на лекови и храна, информираат од Амбасадата на Украина во Северна Македонија.
Изјава на Министерството за надворешни работи на Украина Ви ја пренесуваме интегрално:
„Спротивно на постигнатите договори, на 7 март Руската Федерација повторно го прекина отворањето на хуманитарни коридори за евакуација на цивили од околните градови во Кијивската, Харкивската, Доњецката и Херсонската област.
Руските вооружени сили продолжуваат да нанесуваат ракетни и бомбашки напади врз Кијив, Мариупол, Волноваха, Суми, Миколајив, Харкив и други населени места, што го оневозможува безбедното заминување на хуманитарните конвои со украински и странски државјани, како и испорака на лекови и храна.
Русија мора да престане да ги прекршува договорите, да престане да шири дезинформации и да манипулира со животите на цивилите. Евакуација преку хуманитарни коридори е можна само со целосно почитување на прекинот на огнот, на што е подготвена украинската страна.
Ние, исто така, ги сметаме за неприфатливи обидите на Москва да ги принуди цивилите од опколените градови да заминат во Русија и Белорусија, со оглед на големата веројатност за провокации, вклучително и земање на евакуирани луѓе како заложници или нивно користење од страна на руската армија како жив штит.
Украина ги повикува државите, вклучително и лидерите кои се во контакт со претседателот Путин, да вложат максимални напори за да ја принудат Русија да обезбеди прекин на огнот за отворање на хуманитарни коридори и спречување на хуманитарна катастрофа од големи размери.
Министерството за надворешни работи на Украина продолжува да биде во постојан контакт со амбасадите на странските земји чии државјани се наоѓаат во областа на воени дејствија и им дава максимална помош за евакуација на нивните граѓани од украинска територија“, пишува во соопштението.
