Во Буча започна ексхумацијата на телата од втората масовна гробница во близина на црквата Свети Андреј и Сите Свети. Обвинителот на Меѓународниот кривичен суд Карим Кан и генералната обвинителка Ирина Венедиктова ја посетија Буча. Во гробницата имало од 40 до 60 тела. На 8 април од првиот гроб беа извадени 57 тела, од кои повеќето со прострелни рани, пишува „Вечерен Киев“.
Во меѓувреме, обвинителот на Меѓународниот кривичен суд Карим Кан и генералниот обвинител Ирина Венедиктова ја посетија Буча во регионот на Киев, каде што е во тек ексхумацијата на телата на убиените цивили од втората голема гробница во локалната црква.
Прес-службата на МКС исто така објави:
„Украина е место на злосторство. Овде сме затоа што имаме добра причина да веруваме дека има злосторства кои спаѓаат во јурисдикција на МКС. Мораме да ја растераме маглата на војната за да дојдеме до вистината“.
Ирина Венедиктова, шеф на обвинителството, рече дека Кан и неговиот тим истражители и експерти ќе започнат независна истрага за воените злосторства во Киев.
„Со него ја посетивме Буча во регионот на Киев, каде денеска почна ексхумацијата на телата на убиените цивили од втората голема гробница на територијата на локалната црква. Како и во претходната гробница, повеќето од 15-те жртви кои се веќе прегледани се со прострелни и шрапнел рани. Тие ја посетија и гаражата за автомобили каде луѓето се обидуваа да побегнат од војната но беа застрелани од руската војска како и една од коморите за мачење, каде седуммина Украинци беа убиени“, напиша Венедиктова.
Обвинителството на МКС и ГПУ ги здружуваат силите за да ги истражат воените злосторства на руските окупатори во Украина.
„Канцеларијата на обвинителот на Меѓународниот кривичен суд наскоро ќе се приклучи на работата на нашиот заеднички истражен тим, кој го формиравме со Литванија и Полска на платформата на Европравда“, рече Венедиктова.
Ирина Венедиктова рече дека до 10 април во регионот на Киев, украинските службеници за спроведување на законот го потврдиле убиството на 1.222 украински граѓани од страна на руската војска.
Превод: Жорж Димовски
