пишува: ЉУБИША НИКОЛОВСКИ
Исказот од насловот на оваа колумна не е мој. Многу личи како да е на некој бугарски радикал, нели, како на пример на Ангел Џамбаски, кој севезден нешто навредливо кажува за Македонија. Но не е ниту негов. Тоа е мислење на еден наш „експерт“, Македонец, Синиша Пекевски, кој пред некој ден, онака без пардон го истресе во ТВ дебата на „Само вистина“. И тоа точно вака рече:
„Македонија е канцерогена држава, во која ништо добро не се случува, во која не владее правото и која постојано е на работ на конфликт. Внесувањето на таква држава во Унијата, такво страно тело, такво болно парче, може само да доведе до проблем внатре во ЕУ“!!!
Бреее….Ужасија.
Колку до утредента се ужаснав уште повеќе кога го прочитав и ставот на бугарскиот европратеник Андреј Слабаков од националистичката ВМРО-бугарско националано движење по повод усвојувањето на Извештајот за напредокот на Северна Македонија, кога рече дека „членството на Северна Македонија е рамно на „тумор за ЕУ“.
Каква сличност. Канцер, тумор!!! Па кој од кого овде препишува? Нашиот од нивниот, или нивниот од нашиот?
Ако кон овие двајца ја придодадеме и изјавата на „чувениот“ македономрзец, европратеник Ангел Џамбаски ќе сфатите каква „непринципиелна“ коалиција се формира меѓу бугарско-македонските експерти по прашањето Македонија:
„Нереформирани земји (с.р. Македонија) како членки на ЕУ, се добредојдени за Москва. Таа би сакала што е можно повеќе нереформирани земји, кои имаат проблеми со соседите да станат членки на Унијата. Колку повеќе расправии може да се набуткаат во ЕУ од Москва, толку подобро за Москва, една разединета и раскарана ЕУ е во интерес на Кремљ“, смета Џамбаски.
Значи, според него, Русија и е спонзор на Македонија за во ЕУ! А кога таа ќе стане членка ќе ја растури Европската Унија! Се разбира затоа што е „канцер“!
Па што е разликата во ставовите меѓу тројцата „експерти“?
Па нема разлика! Тие се с`шти.
Само за Бугарскиве „тиквари“ претпоставувам дека работат во интерес на својата земја, а за која земја работи нашиот?
Не е за верување колку Македонци ја мразат Македонија, и колку гнасотии се спремни да истурат врз неа. Но за некои од нив сфаќаш, уствари, дека тие всушност ја мразат- оваа власт. Но во нивниот мозок има гребнатинка според која тие ја поистоветуваат државата со партијата. Па сакајќи да ја навредат колку можат повеќе партијата на власт, тие ја посипуваат со измет државата, несвесни дека самите се замачкале со истиот. (измет.)
Со месеци се гадиме од изјавите на бугарските националисти кои секојдневно нè навредуваат, не бирајќи зборови со кои сакаат да нè понижат и национално да нè деградираат, не признавајќи ни ја ниту државата, ниту народот, ниту јазикот. Но ним можеме, без око да ни трепне, да им вратиме со иста мерка. Ама како да се справиш со „нашите“ кои со исти зборови атакуваат врз македонското достоинство, кои ја негираат и понижуваат својата држава. Тие или не сфаќаат дека им стануваат помошна алатка во „аргументите“ на овие бугарски шовинисти, или пак почнувате да се сомневате дека свесно им се ставаат во служба и дека работат за туѓи интереси.
Абе не се Бугарите во Македонија проблем, проблем се Бугарашите во Македонија.
