Се подготвуваме за многу активни недели во втората половина на август – преговори, состаноци, Кримската платформа, нови обраќања до странските заедници, меѓународно правна активност – на наша иницијатива, вели украинскиот претседател Володимир Зеленски во своето обраќање..ж
„Оваа недела ќе продолжам да ги проширувам нашите врски со африканските држави и регионот на Латинска Америка. Утре ќе се одржат важни контакти на европско ниво. Деновиве е планирана церемонија на предавање на акредитивните писма на амбасадорите на странските земји кои дојдоа на работа во Кијив. Иако сега има одредена пауза во глобалната политика – сепак, август е, но за Украина, за интересите на нашата држава, немало паузи, нема и нема да има.
Работиме на нови санкции против Русија и на стимулирање на граѓаните на терористичката држава да го почувствуваат својот дел од одговорноста за она што се случува.
Дискусијата за визните ограничувања во Европа за имателите на руски пасоши секојдневно се проширува, во неа се приклучуваат нови држави и нови политичари. На крајот, ова треба да доведе до соодветни одлуки.
Благодарен сум им на нашите разузнавачи, службеници за спроведување на законот, новинари и на сите што работат на утврдување на целосните податоци за руските убијци. Украина и нашите партнери добиваат се повеќе информации за директно одговорните за теророт и тортурата, за таканареченото филтрирање и депортирање на нашиот народ, за грабежите…
Сите овие нелуѓе дефинитивно ќе одговорат.
Но, мораме да запомниме дека кога злото добива такви размери, молкот на луѓето се приближува до нивото на соучесништво. А отфрлањето на вистинската борба против злото му станува помош. Затоа, ако имате руско државјанство и молчите, тоа значи дека не се борите, што значи дека го поддржувате. И без разлика каде сте – како на територијата на Русија така и во странство – вашиот глас треба да звучи за поддршка на Украина, а со тоа и против оваа војна.
Врховната Рада на Украина во блиска иднина ќе треба да донесе одлука за продолжување на воената состојба и општа мобилизација. Очигледна одлука, очигледни причини.
Украина отсекогаш се стремела и се стреми за мир и многупати во различни формати на преговори му понудила на руското раководство да ја прекине војната и да ја ослободи украинската земја од окупација. Но, Русија засега верува во терор, се наоѓа во канџите на своите пропагандни илузии и се уште се надева дека наводно може да постигне нешто преку разни форми на уцени. Нема да може.
И затоа, мора да се браниме, мора да одговориме на секоја манифестација на терор, на сите гранатирања – на брутално гранатирање кое не престанува ниту еден ден. За жал, имаме загуби. Но, ние мора да се бориме на сите нивоа и на сите фронтови, да ја зајакнеме нашата држава што е можно повеќе, да го зачуваме нашето единство и да привлечеме уште повеќе земји во нашата антивоена коалиција.
Колку ќе биде посилна Украина, толку ќе биде послаба Русија, и така, толку помалку време ќе трае оваа војна. И секој во Украина, секој во слободниот свет мора да направи се што е во нивна моќ и се што е можно, така што Русија и оние кои ја поддржуваат војната да платат уште поголема цена за рускиот државен терор.
Им благодарам на сите наши бранители и бранителки!
Им благодарам на сите Украинци – на сите оние кои се држат, кои им помагаат на другите, кои веруваат во победата и ја приближуваат со своите постапки – како што можат.
Секој нов ден треба да донесе нов резултат за Украина.“, истакна Зеленски.
