Украинскиот претседател Володимир Зеленски, во обраќањето пред Советот на Европа, ги повика меѓународните партнери да го забрзаат спроведувањето на одлуките за снабдување на Украина со воздушни и ракетни одбранбени системи за заштита од рускиот терор.
„Мораме да направиме сè што е можно за Русија да биде целосно невозможно да го уништи нашиот енергетски систем со проектили и беспилотни летала. Веќе добивме многу ефикасен систем IRIS-T од Германија. Му благодарам на Канцеларот за тоа. Овој одбрамбен систем не го штити само украинското небо. Ја штити европската стабилност, го ограничува рускиот терор, кој ја погодува и нашата земја и во иднина вашите земји. Но, ни требаат повеќе системи за противвоздушна одбрана и противракетна одбрана за да создадеме навистина сигурен воздушен штит“, рече Зеленски.
Тој рече дека некои земји од ЕУ веќе го потврдиле учеството во оваа работа и ги повика „да го забрзаат спроведувањето на одлуките што е можно повеќе“.
„Сега се свртувам кон Франција, Италија и нашите други партнери – не само во Европа, туку и во Соединетите Американски Држави. Не само на оние кои произведуваат системи за противвоздушна одбрана и противракетна одбрана, туку и на оние кои ги имаат потребните системи. Колку е позаштитено небото на Украина, толку постабилен ќе биде животот во цела Европа. Мораме да го обезбедиме тоа“, рече Зеленски.
Тој рече дека има нова ескалација на рускиот терор и бара да се преземат нови чекори како одговор – „брзи чекори во солидарност, чекори кои ќе ги заштитат и Украинците и сите Европејци“.
Зеленски истакна дека европските капацитети за складирање гас се полни, но, за жал, многу сериозниот предизвик на ценовната криза, што Русија ја поттикнува за да предизвика социјална тензија во европските земји, сè уште останува. Според него, тоа е пресметаниот притисок на Русија врз семејниот буџет на секое европско семејство.
Покрај тоа, Зеленски потсети дека нападите на руските крстосувачки ракети и иранските борбени беспилотни летала уништија повеќе од една третина од енергетската инфраструктура на Украина, со што земјата стана неспособна да извезува електрична енергија во Европа. Во врска со тоа, тој исто така рече дека со тоа Русија предизвикува нов бран на миграција на Украинците во ЕУ.
Од 10 октомври Русија изведува масовни напади со проектили и беспилотни летала камикази врз енергетската и цивилната инфраструктура на Украина.
Подготви: Ј. Ѓ.
