Изминатата година за жал немаше капитални инвестиции во општините и 2022 година е со најниско нивото на инвестирање, оценува министерот за локална самоуправа Ристо Пенов, во интервју за „Фронтлајн“. Тој вели дека за ваквата состојба постојат објективни и субјективни причини.
„Во објективните секако спаѓа енергетската криза која доаѓа по ковид пандемијата кој исто така ги наруши економските текови. Сепак забележителна е појава која треба да се анализира, а тоа е дека заради енергетската криза трошоците на општините за енергија во првите девет месеци во 2022 се зголемиле за една милијарда денари повеќе од она што го плаќале во 2021. Тоа е огромно зголемување на трошоците. За да ги надоместат тие трошоци, општините ги намалиле капиталните инвестиции најдрастично. Но затоа пак кај платите секаде има некаков пораст, како и кај договорните услуги“, вели Пенов.
Според него а одбележување е што инвестициите не се намалени само за една милијарда денари, колку што бил трошокот за електрична енергија, туку се намалени за милијарда и деветстотини милиони денари, односно скоро двојно, што, додаде Пенов, е неповолен и неоправдан ефект. Тој додаде дека некои други трошоци се зголемиле, како што се платите и договорните услуги.
Министерот наведува дека најголем пад има во Скопје. Исто така вели дека постојат и општини каде зголемени се и долговите за дополнителни осумстотини милиони денари, што говори за катастрофална 2022 година.
„Но, има и позитивни примери. На пример Скопје, каде има најголем пад на капитални инвестиции, нема зголемување на долговите. Општина Карпош пак е лидер во намалување на долговите, речиси до нула. Тоа говори дека останатите општини (градоначалници) многу неекономично работеле и неефикасно во реализација на проектите од интерес за граѓаните“, рече Пенов.
Погледнете го целото интервју со министерот Ристо Пенов
(ВИДЕО) Пенов: Општините останаа без капитални инвестиции и ги зголемуваат долговите
