Особеност е четврта самостална изложба на Игор Поп Трајков. Во неа уметникот експериментира со новите дигитални технологии, како и со комбинацијата на новите со традиционалните техники во сликарството. Оваа изложба на дигитални слики ќе се отвори на 10 јули 2023 во Галеријата Ко – Ра во ЈУ Дом на култура Кочо Рацин, Скопје во 20 ч. во рамки на Скопско лето 2023.
Што е модерноста, а што особеноста? Модерноста, а особено глобализацијата го потцртаа влијанието на другоста, односно на културите кои се надвор од нашата. Со ова настана мешањето на многубројните културни идентитети, но кои не толку се мешаа колку што се прилагодуваа едни на други. Така сѐ повеќе ја имаме млакоста која се наддава со индивидуалноста, небаре го брани светот од силеџијство. Но не е секој нели добредојден во нашиот свет. Сепак особеноста би требало да биде онаа која може да го поттикне развојот на сѐ.
Како што вели кураторката на изложбата Особеност- Џоана Пентала:
„Уметникот на оваа изложба има страст да учествува во бројни општествени, уметнички и интелектуални активности и настани, како онлајн, така и лично. Тој постојано се опкружува со други уметници, поети, писатели и интелектуалци од сите видови. Ова е сопствената, единствена, модерна верзија на француските салони на Поп Трајков, каде уметниците можат да црпат инспирација еден од друг. Последователните проекти на уметникот јасно го одразуваат ова.
Нерасположената и на многу начини корумпирана културна средина од која потекнува Поп Трајков и во која мораше да опстојува толку долго, се обиде да му ги наметне своите правила. Уметникот гледа начин да избега од тоа во неговата „особеност”, односно во неговото одбивање да стане како другите. Како што може да се види од оваа изложба, неговото бегство е всушност лажно и иронично и само покажува дека уметникот не е дел од корозивната реалност, односно дека не сака да биде дел од неа; вистината во овој случај би била дека мора да се соработува со темната страна, а покажувањето на спротивставување е повеќе симболичен отколку херојски гест.
Користејќи ги неговите омилени средства за изразување- херменевтика и деконструкција, како и експериментирање со новите визуелни технологии, уметникот ни претставува низа историски истражувања на тема особеност, било да е тоа со позитивна или со негативна конотација… Ова е најпривлечно кога нешто или некој не се покорува или не се наведнува пред очекуваниот тек на нештата, туку покажува одредено или целосно отстапување од пробиениот колосек.”
Особеност- изложбата на дигитални слики ќе биде поставена во ЈУ Дом на култура Кочо Рацин до 20 јули 2023.