Четири руски воени авиони во воздухопловна база во регионот Псков се во пламен во, како што изгледа, најголемиот напад со беспилотни летала врз земјата од почетокот на војната во Украина.
Според Метро, непотврдени медиумски извештаи сугерираат дека меѓу 10 и 20 беспилотни летала погодиле воздухопловна база во регионот Псков, во близина на границата со Естонија и Латвија, нешто пред полноќ во вторник.
Сликите на социјалните мрежи покажуваат огромен црн облак од чад кој доаѓа од локацијата, осветлен портокалово од пламенот во неговата основа.
Во нападот врз базата, која го опслужува истоимениот главен град на регионот, оштетени се четири транспортни авиони Ил-76, според руската државна новинска агенција Тас, повикувајќи се на официјални лица за вонредни состојби.
Дополнителни беспилотни летала беа соборени над Ориол, Брјанск, Рјазан, Калуга и московскиот регион, соопшти руското Министерство за одбрана.
Регионалниот гувернер на Псков, Михаил Ведерников нареди денеска да бидат откажани сите летови до и од погодениот аеродром, за да може да се процени штетата на дневна светлина. Сепак, тој рече дека пожарот е локализиран и дека нема жртви.
Степенот на штетата на транспортните авиони не е познат, иако се чини дека видеото покажува дека еден од авионите интензивно гори.
Три аеродроми надвор од Москва – Шереметјево, Внуково и Домодедово – исто така привремено ги прекинаа летовите, мерка што стана рутина по нападите со беспилотни летала.
Засега нема коментар од украинските власти, кои обично одбиваат да преземат одговорност за какви било напади на руска територија.
Во руските напади со ракети и беспилотни летала врз Кијив рано утринава загинаа две лица, а уште три се повредени, објави началникот на воената администрација на Украина Сергеј Попко.
Подготви: Д. Мишев / Цивил Медиа
