Во рамки на официјалната посета на Северна Македонија, заменик министерот за надворешни работи на Украина, Јевген Перебијнис денеска лично му го врачи Орденот за заслуги од украинскиот претседател Володимир Зеленски на претседателот на ЦИВИЛ, Џабир Дерала.
Зеленски, со Указот број 556/2023 го одликува Џабир Дерала со Орден за заслуги, во чие друштво се наоѓаат и генералниот секретар на НАТО, Јенс Столтенберг, како и светски познатите актери, Ален Делон и Кетрин Денев.
На денешната церемонија на доделувањето на ова признание присуствуваа амбасадорката на Украина, Лариса Дир, како и претставници на амбасадата и на ЦИВИЛ.
Ова високо државно одликување претседателот Зеленски му го доделува на Дерала за посебни заслуги во борбата против дезинформациите и руската пропаганда.