Српскиот претседател Александар Вучиќ вечерва објави дека коалицијата „Србија не смее да запре“, предводена од неговата Српска напредна странка, на денешните избори освоила апсолутна победа на републичко и на покраинско ниво, а очекува да ја формира власта и во Белград.
Во првото обраќање по затворањето на гласачките места, Вучиќ рече дека врз основа на 76 проценти преброени гласови, без резултатите од Косово и Метохија, неговата листа сигурно ќе има повеќе од 127 мандати и апсолутно мнозинство во Парламентот на Србија.
На изборите за Собранието на Војводина, Вучиќ кажа дека „Србија не смее да запре“ ќе освои меѓу 67 и 69 пратенички места, а заедно со нивниот традиционален партнер Сојузот на војвоѓанските Унгарци и со СПС, може да се достиге бројката од 84 пратници.
Што се однесува до Белград, тој рече дека мнозинството за формирање на градската власт ќе зависи од Бранимир Несторовиќ, но оти е сигурен дека градоначалник повторно ќе биде Александар Шапиќ.
Лидерот на Социјалистичката партија на Србија (СПС), Ивица Дачиќ, пак, изјави дека не е задоволен од изборните резултатите и дека, според негово лично мислење, треба да се најде нов лидер на СПС.
ЦеСИД/ИПСОС, врз основа на 80,2 отсто преброен гласови, соопшти дека листата „Александар Вучиќ – Србија не смее да запре“ освоила 46,4 отсто од гласовите или 129 мандати.
На второ место е „Србија против насилството“ со 23,3 отсто или 64 мандати.
Третата позиција ја зазема коалицијата на СПС со 6,7 отсто или 18 мандати.
Коалицијата НАДА освои 4,8 отсто или 13 мандати.
Според овие проекции, над цензусот е и листата „Д-р Бранимир Несторовиќ – ние – гласот на народот“ со 4,8 отсто од гласовите, односно 13 мандати.
Од малцинските листи, Сојузот на војвоѓанските Унгарци се очекува да има шест мандати, коалицијата на Партијата за правда и помирување и Демократскиот сојуз на Хрватите во Војводина три мандати, СДА Сулејман Угљанин два мандата и по еден листата на Шаип Камбери и Руската партија.
На последната прес конференција на коалицијата Србија против насилството“ соопштено е дека оваа каолиција не може да ги прифати изборните резултати и на државно ниво и во градот Белград „онака како што ги соопшти претседателот на Србија, Александар Вучиќ“ и ќе бараат од РИК да им се достават „физичките записници од лице место“, обвинувајќи притоа за „невидено изборно насилство“, јави дописникот на МИА од Белград.
Мирослав Алексиќ, носител на листата „Србија против насилство“ изјави дека денеска биле сведоци на „невидено изборно насилство“.
-Денеска видовме нешто што не беше пракса, луѓето кои не живеат во Белград беа донесени да гласаат како да се белграѓани. Собирниот центар беше Арената и за тоа имаме информации што ќе ги презентираме. Не можеме да го прифатиме ова како резултат на фер и демократски избори, рече тој.
Алексиќ повтори дека сè уште не ги добиле сите гласови, бидејќи се пребројуваат и дека резултатите нема да ги знаат до доцна во ноќта, но извесно е дека на парламентарните избори СНС го освои првото место, нивната коалиција второ, следи СПС, Нов ДСС- Нада и „Ние, гласот на народот“.
Тој додаде дека во Белград биле пребројани мал број гласови.
-Сигурно е дека во овој момент не станува збор дека СНС победил во Белград. Според нашите проценки, во Белград се издадени 40.000 лични карти на луѓе кои не живеат овде. И покрај тоа, СНС и ние сме донекаде еднакви, но најголемите избирачки места се уште не се преброени, рече тој.
Носителот на изборната листа „Србија против насилството“, Мариника Тепиќ изјави дека апсолутно не го прифаќаат соопштението за изборите во Белград како што го претстави СНС и дека ќе ги употребат „сите демократски средства за одбрана на волјата на сите граѓани на Србија. “.
-Сосема е јасно дека во Белград опозициските партии добија повеќе гласови од партиите кои досега ја претставуваа власта во главниот град, изјави претседателот на Партијата на слободата и правдата, Драган Ѓилас.
Откако ќе ги добијат сите податоци, кажа тој , ќе поднесат приговори, ќе одат во РИК и ГИК, а ќе се договорат и да побараат поддршка од граѓаните на Белград на начин што одговара на ситуацијата.
-Она што е јасно е дека нема да употребиме никакво насилство. Ние сме листа која се бори против насилството и за пристојност, нормалност, демократија и правото на граѓаните да гласаат слободно. Добро знаете дека листата на Александар Вучиќ имаше најмалку 10 отсто повеќе благодарение на медиумската тортура на која сме изложени, дека притисокот врз гласачите беше огромен, дека имаше купување гласови, рече Ѓилас.
На прашањето дали повторно ќе има протести, тој одговори – се е можно.
