„Северна Македонија од почетокот на руската инвазија досега испрати 14 пакети на помош за Украина и спроведовме обука на украински војници во Криволак. И помагаме на Украина поради тоа што таа земја има право да го одбрани својот територијален интегритет и суверенитет, затоа што е нападната од агресор кој нема да престане ако не му се возврати со отпор. Со нашите одлуки покажавме дека сме дел од светот кој застана зад правото на една држава да ја избира својата иднина. Целта на Русија беше да се обиде да внесе раздор помеѓу земјите–членки на НАТО. Но, го постигна токму спротивното. Од руската агресија до денес, Алијансата е посилна за две нови земји – Финска и Шведска, а сите заедно сме пообединети од кога било досега во намерата да ја заштитиме секоја педа НАТО територија,“ изјави во интервју за „Локално“ , министерката за одбрана Славјанка Петровска.
Во врска со предложената рехабилитација на деца и лечење на украински војници во земјава од страна на претседателот Пендаровски, Петровска посочи дека ставот на Северна Македонија за поддршка на Украина е јасен, позитивен, како и дека во тек се анализи за начинот на спроведување на оваа поддршка.
„Министерството за одбрана, односно Армијата на Република Северна Македонија во својата структура го има Воено-медицинскиот центар кој може да пружи општа медицинска помош, односно амбулантско лекување, но не и да лекува во болнички услови. А течат анализите за начинот на кој ќе се пристапи кон можноста за ваков тип на поддршка со Министерството за здравство, но убедени сме дека доколку се упати такво барање од украинската страна ќе може да се најде решение и да се излезе пресрет на земјата која има за цел да го одбрани својот суверенитет од руската агресија,“ истакнува Петровска.
