„Она што го наследивме како политичка влада во 2016 година, беше релативно пристојно развиен систем, добро развиен систем на функционирање на зоните, коишто во тој момент генерирало меѓу 6 и 7 илјади работни места во државата, со одредена бројка странски компании внатре, и одредено ниво јавни приходи коишто тие компании со своето работење го уплаќале во буџетот, коешто не надминувало повеќе од седум или осум милиони евра на годишно ниво.
Со преземањето на власта од страна на СДСМ во 2017 година па се до денеска, а јас половина од овој период бев на чело на оваа дирекција, ТИРЗ, можам да кажам дека остваривме навистина добри резултати. Во моментов имаме над 18 илјади работни места, што значи дека бројката на работни места е зголемена за два и пол пати“, вели директорот на ТИРЗ, Јован Деспотовски, во интервју за ЦИВИЛ Медиа, во однос на тоа како е наследена дирекцијата, и што и остава на новата влада.
Со Деспотовски разговаравме за привлекување на странските инвестиции, платите во ТИРЗ надвор од слободните зони, најавената милијарда евра од Унгарија од страна на новиот премиер Мицкоски, но и економските проекции во програмата за работа на новата влада.
„Она што очекувам дека владата ќе го презентира, е кои се условите за користење на тие средства, и уште поважно, за што ќе бидат наменети. Има информации дека дел од тие средства ќе завршат во општините, што може да биде и добро доколку реално завршат за капитални инвестиции, а притоа мора да се внимава за болката којашто постојано ја имаме наназад со децении, а тоа е капацитетот на администрацијата, без разлика дали на локално или централно ниво, да реализира капитални проекти.
Ако тие средства се добијат со поволна каматна стапка, и се вложат во проекти кои ќе генерираат додадена вредност, не гледам причина зошто да не се даде поддршка за тој потег на владата, и да се обезбеди таа „инекција“ за забрзан економски раст“, вели Деспотовски за најавената милијарда евра на Мицкоски, од Унгарија.
Разговорот го водеше: Дијана Тахири
Камера и монтажа: Ариан Мехмети
Фотографија: Биљана Јордановска
Преземено: Цивил Медиа
