Властите во Бразил потврдија дека се пронајдени сите тела на загинатите во авионската несреќа во бразилската држава Сао Паоло и дека идентификацијата на жртвите од несреќата на двомоторниот авион на компанијата Воепас што се урна во областа на градот Вињедо е во тек.
Видео споделено на социјалните мрежи, што го пренесуваат светските медиуми, покажува дека авионот губи контрола и се врти околу својата оска пред да падне во близина на населено место.
Како што јави Би-Би-Си, во саботата бројот на жртви е ревидиран на 62, бидејќи по првите најави е потврдено дека на кобниот лет имало уште еден патник кој не е евидентиран.
Бразилскиот претседател Луис Инасио Лула да Силва прогласи тридневна жалост поради авионската несреќа кај Сао Паоло во која загинаа сите патници и членови на екипажот.
„Од моментот на објавување на оваа уредба, официјално прогласувам тридневна жалост низ целата земја за жртвите во авионската несреќа“, се вели во соопштението на Лула да Силва објавено на мрежата Х.
Ј. Ѓ.
