Претседателот на Владата на Република Северна Македонија, Христијан Мицкоски одговарајќи на новинарско прашање дали е задоволен од првите 100 дена нова Влада од секторот здравство истакна:
„Апсолутно сум задоволен и тоа го кажавме на почетокот од оваа прес-конференција. Дали може подобро? Секогаш може подобро, секој може подобро, сите ние можеме подобро и тоа суштината на Владата, да од ден на ден биде подобра од претходниот ден. И така ќе биде сѐ додека е оваа Влада“.
Тој смета дека сето она коешто беше проблем во општеството полека, но сигурно веќе го нема и апсолутно е многу подобро.
„Веќе нема скандали, нема братучеди, браќа, внуци и слично. Нема голобради момчиња коишто шетаат по институциите со торби и слично и се главни инвеститори во трговски-деловни единици во центрите на градовите ширум државата. Ако има такви ја повикувам јавноста слободно и луѓето коишто се жртви на такви измамници да пријават. Така што мислам дека полека но сигурно сето она коешто беше проблем во општеството го нема, не велам дека е решено, не е возможно за 100 дена да се реши сѐ. Ние не сме магионичари нити магии ветувавме, нити чуда затоа што тој што ветува чуда и магии не ја говори вистината. Но, дали е подобро? Апсолутно е многу подобро. Дали може подобро и од ова? Секој ден може подобро. Ако ова прашање ми го поставите после две години за првите две години, ќе ви речам беше добро, но може подобро. Така што, целта е да секој ден биде подобар од претходниот. Дали ќе направиме некоја ненамерна грешка, и тоа ќе се случи. Затоа што човек што работи понекогаш и греши. Само што тој што ништо не работи, не може да погреши. Така што битно е да нема катастрофални грешки, да нема грешки коишто ќе имаат импликации подолгорочни“.
Претседателот на Владата Мицкоски потенцираше дека е прилично задоволен од тоа што е постигнато овие 100 дена и додаде:
„Ќе ве потсетам, уште еднаш ќе повторам, мора да ги повторуваме овие работи. Сметката на Владата на 24 јуни 2024 година за првпат во историјата на независна Македонија беше минус 200 милиони евра, минус 12 милијарди денари. Овој месец очекуваме да биде на позитивна нула. Ете тоа е она што ние го работевме. Повторно ќе кажам, дали е тоа доволно? Не! Утре ќе биде подобро, за месец дена ќе биде подобро, за една година ќе биде подобро. Дали можеше подобро? Сигурно дека можеше! Дали можеше многу полошо? Можеше! Видовме што е, како е лошо раководење со држава. Така што јас сум исклучително задоволен и од работата на министерот и од ова што се случува во овие први 100 дена имајќи предвид каква состојба затекнавме“.
