Американскиот претседател Џозеф Бајден изјави денеска дека се надева оти синоќешните израелски воздушни напади врз Иран ќе бидат „крај“ на директната размена на оган меѓу двете земји.
Зборувајќи со новинарите пред да го напушти меѓународниот аеродром во Филаделфија во Пенсилванија, тој рече: „Мојата надеж е дека ова е крајот“.
Генералниот секретар на Обединетите нации, Антонио Гутереш е „длабоко загрижен поради ескалацијата на насилствата на Блискиот Исток“ по израелските напади врз Иран, рече неговиот портпарол Стефан Дужарик во денешното соопштение.
„Генералниот секретар итно го повторува својот повик до сите страни да ги прекинат сите воени дејствија, вклучително и Газа и Либан, да ги направат сите можни напори за да се спречи сеопфатна регионална војна и да се вратат на патот на дипломатијата“, додаде Дужарик.
ЕУ повика на „најголема воздржаност“ по нападот на Израел врз Иран
Европската унија денеска ги повика сите инволвирани страни да покажат „најголема воздржаност“ за да се избегне „неконтролирана ескалација“ на конфликтот на Блискиот Исток, откако Израел гаѓаше цели во Иран.
„Опасната спирала на напади и одмазда создава ризик да предизвика ново продолжување на регионалниот конфликт. Признавајќи го правото на Израел на самоодбрана, ЕУ ги повикува сите инволвирани страни да покажат најголема можна воздржаност со цел да се избегне ескалација надвор од контрола која не е во ничиј интерес, соопшти Европската унија.
Израел предупреди дека Иран ќе плати „тешка цена“ доколку одговори на тие напади, кои пак беа одговор на нападите на Иран врз Израел на 1 октомври.
Париз и Берлин повикаа на деескалација на тензиите на Блискиот Исток
Германија и Франција повикаа на воздржаност и деескалација на тензиите на Блискиот Исток откако израелските одбранбени сили (ИДФ) синоќа извршија воздушни напади врз Иран. Истовремено, Сирија и владејачките талибанци во Авганистан категорично го осудија нападот, пренесоа светските агенции.
„Мојата порака до Иран е јасна: не можете да продолжите со масовен одговор на ескалација. Ова мора да заврши. Ова би обезбедило можност за мирен развој на Блискиот Исток“, напиша германскиот канцелар Олаф Шолц на социјалната мрежа Икс.
Париз „итно ги повикува страните во конфликтот да се воздржат од ескалација и активности кои би можеле да ги влошат тензиите во регионот“, се вели во соопштението на француското Министерство за надворешни работи.
Руското Министерство за надворешни работи денеска соопшти дека е длабоко загрижено поради ескалацијата на тензиите меѓу Израел и Иран и повика на нормализирање на ситуацијата на Блискиот Исток, откако Израел изврши воздушни напади врз воени објекти во Иран.
Арапските земји ги осудиja израелските напади врз Иран
Неколку арапски земји денеска ги критикуваа одмаздничките напади на Израел против Иран поради воена ескалација во регионот и стравувања од сеопфатна војна, пренесе ДПА.
Саудиска Арабија соопшти дека го осудува военото гаѓање на Иран и го нарече „кршење на неговиот суверенитет и кршење на меѓународното право“.
Саудиска Арабија и нејзиниот регионален ривал Иран, кои ги поддржуваа спротивставените страни во конфликтите во Јемен и Сирија, минатата година со посредство на Кина се договорија да ги обноват врските по прекин од седум години.
Монархијата богата со нафта денеска ги повика сите страни да покажат најголема воздржаност и предупреди на „последиците од континуираните воени конфликти“ во регионот.
Нарекувајќи го нападот „еклатантно кршење“ на иранскиот суверенитет, Катар изрази „екстремна загриженост“ поради потенцијалните „опасни“ последици и повика на воздржаност.
Катар, САД и Египет со месеци посредуваат меѓу Израел и палестинското милитантно движење Хамас за да склучат примирје во Газа и договор за ослободување на заложниците.
Обединетите Арапски Емирати и Оман, две други земји од Заливот, исто така го осудија израелскиот напад.
Ирак, дом на милициите подредени на Иран, ги осуди израелските напади и изрази солидарност со соседен Иран.
– Ирак претходно предупреди за тешките последици кои произлегуваат од молкот на меѓународната заедница за бруталните дејствија на ционистичкиот ентитет (Израел), вклучувајќи ги и неговите напади против нашиот народ во Палестина, Либан, Сирија и сега оваа нова агресија против Иран, изјави владиниот портпарол во соопштение објавено на интернет.
Новиот министер за надворешни работи на Иран Абас Арагчи пред само неколку дена посети неколку арапски земји, промовирајќи ја дипломатијата во регионот.
Од почетокот на војната во Газа во октомври минатата година меѓу Израел и Хамас, проиранските милиции во регионот презедоа одговорност за серија напади врз Израел.
„Сирија ја изразува својата солидарност со Иран и потврдува дека стои на негова страна. Дамаск одлучно го поддржува законското право на Исламската Република на самоодбрана, заштита на нејзината територија и животите на нејзините граѓани“, се вели во соопштението на сириското Министерство за надворешни работи.
Израел во текстот е обвинет дека „го игнорира меѓународното право и го продолжува својот криминален и агресивен курс против народите во регионот“.
Во соопштението, Министерството за надворешни работи во Кабул, контролирано од Талибанците, го осуди нападот и ја повика владата на Израел да го запре „ширењето на натамошното насилство и криминал во регионот“, јави ДПА.
Израелските воздухопловни сили синоќа гаѓаа цели во Иран, при што загинаа двајца ирански војници.
Иранското Министерство за надворешни работи соопшти претходно денеска дека Иран има право и должност да се брани по последните израелски напади.
Израелските напади се одмазда за иранските ракетни напади врз Израел на почетокот на октомври.
Ј. Ѓ.
Поврзано:
Израел утрово нападна ирански воени локации, загинати војници и оштетени воени бази
