Претседателот на Република Северна Македонија, Стево Пендаровски, денеска престојува во официјална посета на Република Австрија. Со највисоки државни и воени почести Пендаровски во Виена беше примен од сојузниот претседател Александер Ван дер Белен, со кого оствари и билатерална средба.
Пендаровски на средбата истакна дека посетата во пресрет на одбележувањето на 25-годишнината од воспоставувањето на дипломатските односи меѓу двете држави е уште еден показател дека Северна Македонија и Австрија се пријателски и партнерски земји.
Двајцата претседатели разговараа и за одлуката којашто Северна Македонија ја очекува од Европскиот совет за почеток на претпристапните преговори за членство на земјата во ЕУ. Пендаровски истакна дека позитивна одлука би била заслужено признание за досегашната улога на Северна Македонија, како во креирањето на добрососедската политика во Југоисточна Европа, така и во европските интегративни процеси во кои нашата држава несебично дава свој придонес.
„Граѓаните на Северна Македонија оваа недела го очекуваат датумот за почеток на претпристапните преговори“, рече Пендаровски на средбата со претседателот Ван дер Белен, потенцирајќи дека за државата не постои друга алтернатива.
Ван дер Белен, реафирмирајќи ја австриската поддршка во евроинтеграциски процеси н РСМ, истакна дека Северна Македонија заслужува да добие датум за почеток на претпристапните преговори.
Во рамки на официјалната посета на Република Австрија, Пендаровски треба да оствари средби и со сојузната канцеларка, Бригит Биерлејн и со претседателот на Националниот совет на Сојузното собрание на Република Австрија, Волфганг Соботка.
