САД ќе забранат издавање визи за околу 20 Грузијци одговорни за „поткопување на демократијата во Грузија“, вклучително и министри, пратеници и безбедносни службеници, соопшти Стејт департментот. Во соопштението не се наведени имињата на грузиските официјални лица на кои ќе им биде забрането да добијат визи за САД.
Стотици луѓе се уапсени во Грузија откако пред речиси две недели избувнаа протести против одлуката на владејачката партија Грузиски сон да ја одложи долгогодишната цел на поранешната советска република за пристапување во Европската унија.
„САД силно ја осудуваат партијата Грузиски сон за нејзиното тековно, брутално и неоправдано насилство врз грузиските граѓани, вклучително и демонстранти, претставници на медиуми, бранители на човекови права и опозициски личности“, соопшти Стејт департментот.
Во соопштението се додава дека се „подготвуваат дополнителни активности, вклучително и санкции, за да ги повика на одговорност оние што ја поткопуваат демократијата во Грузија“.
