– По шест месеци Влада на ВМРО-ДПМНЕ се чуствува голема економска несигурност и слабеење на стандардот на граѓаните. Сметките растат, цените растат, а Владата со измама се обидува да ги излаже луѓето дека со нешто им помага, истакна лидерот на СДСМ, Венко Филипче во објава на социјалните мрежи.
Реалноста, вели Филипче, е сосема друга од онаа која ни ја презентира Мицкоски.
„Граѓаните тоа најдобро го приметуваат кога ќе влезат во маркетите. Лажните кошнички за поевтини цени се трик на Мицкоски и трговците со што тие печалат на маката на луѓето. Го слушам денеска вели срамота било тоа што го правеле трговците. Не господине Мицкоски, срамота е што вие дозволивте тоа да го прават и што тајно со нив се договарате, а во јавноста глумите загрижен политичар. Касно е да ја префрлате вината за овој дебакл и грабеж на трговците, одговорноста е само ваша“, истакнува Филипче.
Тој нагласува дека вечерва во Битола разговарал со членовите на СДСМ, „сите ја делат загриженоста за лошите економски политики на Владата“.
Денеска премиерот Христијан Мицкоски ги обвини трговците за високите цени на прехрамбените производи. Срамота е ова што го прават пред празниците, рече Мицкоски.
Тој упати апел до трговците да го преиспитаат своето однесување во однос на цените на прехранбените производи и најави дека ќе побара од Пазарниот инспекторат вонредна инспекција со цел да се утврди како цената на одредени основни производи е зголемена во изминатите 30 дена.
