Пратеничката група на Левица до Собранието предложи Предлог-закон за денови на жалост.
-Последниот случај со трагедијата во Кочани, во која животот го загубија 60 наши сограѓани – е болен потсетник колку оваа материја е важна и дека е неопходно да се уреди со закон. Со овој Предлог-закон бараме да се воспостави јасен, правичен и достоинствен систем за одбележување на деновите на жалост со цел да се покаже почит, солидарност и да изградиме култура на колективна емпатија во државата, рече пратеникот на Левица Амар Мециновиќ на прес-конференција во Собранието.
Овој закон, како што појасни тој, нуди дефиниција и критериуми за прогласување на денови на жалост врз основа на опфатот и сериозноста на трагичниот настан, прецизна надлежност кој орган го носи решението, во кој рок и на кој начин, обврски за институциите и јавните сервиси за поставување на знамиња на половина копје, соодветна медиумска содржина, одложување на манифестациите што не се соодветни за ситуацијата.
-Ова е со цел заштита на достоинството, за да се спречат навредите, несоодветната употреба на јавниот простор и политичко профитерство од трагедиите, објасни Мециновиќ.
Со законот, како што нагласува пратеникот, нема да се ограничи правото на слободно изразување и приватно однесување, туку тој се однесува за државната, институционалната, јавната работа во тие домени.
– Ова е истовремено и покана за сите политички партии и општествени чинители, да се вклучат и да дадат мислење за оваа сензитивна материја за која мислиме дека ќе наидеме на широка поддршка во Собранието. Меѓу другото, ова наше предлог-решение, доаѓа врз основа на комуникација со медиумски работници и со работници во институциите, рече Мециновиќ.
Од Левица веруваат дека секое општество треба да постави рамка за тоа како да се однесува во моменти на колективна трагедија и болка.
-Во моменталната правна рамка постои сериозен законски вакум кога станува збор за уредување на деновите на жалост. Иако Владата има овластување да прогласи денови на жалост, како што и Законот за знамето предвидува тоа да биде ставено на пола копје – нема јасни правила ниту санкции за непочитување на овој чин. Тоа остава простор за недолично и неетичко однесување, рече Мециновиќ.
Според него, во јавноста има злоупотреба од профитирање врз трагедијата преку сензуалистички медиумски настапи, до институции кои продолжуваат да функционираат како ништо да не се случило и политизација на деновите на жалост.
