Американскиот претседател Доналд Трамп почна притисок за заживување на енергијата на јаглен во САД, погрешно наведувајќи ја Германија како модел за враќање на фосилното гориво, јави ДПА.
Трамп потпиша извршна наредба за зајакнување на „прекрасната американска индустрија за чист јаглен“, сигерирајќи им на федералните агенции да ги повлечат регулативите што го ограничуваат ископувањето и извозот на јаглен.
Говорејќи на настан во Белата куќа заедно со рударите на јаглен, Трамп рече дека укинувањето на ограничувањата ќе обезбеди постарите фабрики за јаглен да останат оперативни, тврдејќи дека енергијата е потребна за напојување на центрите за податоци за вештачка интелигенција.
Трамп, исто така, ја наведе Германија како модел за употреба на јаглен, погрешно наведувајќи дека се отвораат нови фабрики за јаглен низ целата земја.
Германија „позелене толку што за малку ќе згаснаа“, рече Трамп, тврдејќи дека земјата се префрлила на ветер, кој „не дувал премногу“ и на крајот се врати на јагленот.
Во реалноста, според ДПА, последната нова фабрика за јаглен во Германија беше пуштена во употреба во 2020 година. Земјата се обврза целосно да го укине јагленот до 2038 година, со потенцијално претходно укинување до 2030 година.
Јагленот се смета за најзагадувачко фосилно гориво. На климатскиот самит на Обединетите нации (ОН) во Дубаи во 2023 година, светските лидери за првпат се согласија да се префрлат од јаглен, нафта и гас.
Потегот на Трамп доаѓа помалку од една година откако поранешниот претседател Џо Бајден на климатската конференција на ОН во Баку во 2024 година изјави дека револуцијата за чиста енергија е неповратна.
