Со претставата „8%?“ во изведба на АТО Центар за современа уметност и култура – Битола, а во режија на Јован Ристовски вечер во Тирана завршува манифестацијата „Недела на македонската култура“.
Претставата почнува во 20 часот во познатиот театар „АрТурбина“ во Тирана, а претставува моќна приказна за дискриминацијата заснована на вистински сведоштва на поединци од различно етничко потекло од Западен Балкан. Изведбата ќе биде на македонски јазик, а на екран ќе бидат прикажани албански и англиски преводи.
Манифестацијата „Недела на македонската култура“, која првпат се одржува во албанскиот главен град, чија цел беше промоција на македонската култура, туризам и економија, почна на 23 април во концертна сала во една од најубавите цркви на Балканот „Христовото воскресение“ во Тирана.
На свеченото отворање присуствуваше министерот за култра и туризам Зоран Љутков, по што се одржа концертот „Поглед кон иднината“ во изведба на познатата македонска пијанистка Емилија Попивода и реномираната албанска диџејка Реа Лемнуша.
Вториот значаен настан беше одржан на 25 април во македонскиот културен центар-Нобис кога беше отворена изложба на слики со традиционални македонски носии и промоција на книгата „Монографија за македонската народна носија“ на авторот Владимир Јаневски, посветена на овие културни богатства.
Во неделата во познатиот објект „Пирамида“ беше одржана промоција на македонско вино и вински туризам, а дополнителна убавина на настанот му даде настапот на фолклорната група од Пустец, со македонски ора.
Оваа значајна манифестација е во организација на македонскиот Културно-информативниот центар и амбасадата во Тирана, со поддршка на Министерството за култура и туризам, како и албанското министерство за економија, култура и иновации и општина Тирана.
