Политичкиот аналитичар од Сараево, Харун Церо, за ЦивилМедиа ја искоментира скандалозната геноцидна реторика на претседателот на Република Српска, Милорад Додик кој ги повика Бошњаците да се „вратат на својата православна вера“, за БиХ да биде држава со српско мнозинство.
„Неодамнешната изјава на Милорад Додик, во која се сугерира дека Бошњаците „да се вратат на својата стара православна вера“, претставува гротескно искривување на историјата, напад врз верската слобода и директна закана за уставниот поредок и мултиетничкиот карактер на Босна и Херцеговина.
Овие изјави не се „конструктивни предлози“ – тие се опасни, шовинистички провокации вкоренети во етнички супремацизам и историски ревизионизам. Да се сугерира еден цел народ да ја напушти својата религија за да задоволи националистичка визија за држава „со мнозинство српско население“ не е само длабоко навредливо, туку ја одразува и самата логика на културното бришење и присилната асимилација што доведоа до злосторствата во 1990-тите.“, вели Церо за ЦивилМедиа.
Тој посочи дека Босна и Херцеговина е суверена мултиетничка држава изградена врз коегзистенција и меѓународно право, и дека нема да биде сопственост на поедина етничка група, како и дека изјавите на Додик не ја одразуваат волјата на граѓаните на БиХ, туку изолационистичка и фашистичка агенда.
„Босна и Херцеговина не е, и никогаш нема да биде сопственост на која било етничка група. Таа е суверена, мултиетничка држава изградена врз вредностите на еднаквост, коегзистенција и меѓународно право.
Реториката на Додик не ја одразува волјата на граѓаните на Босна и Херцеговина – таа одразува регресивна, изолационистичка агенда која нема место во демократско општество. Шокантно е и неприфатливо што таква отворено фашистичка и секташка изјава е дочекана или со молчење или само со срамежливи реакции од домашните институции и меѓународната заедница.
Ова е само прикриен повик за бришење на идентитетот и постоењето на еден народ.“, посочува Церо.
Д. Т. / Цивил Медиа
