Во сабота, со почеток од 17 часот, во дворот на Домот на култура „Билјана Беличанец“ во Кисела Вода ќе се одржи промоцијата на сликовницата „Другарка, Другарко и две маченца“ од авторот Денис Јанкуловски – Космонаутко, со илустрации на Наташа Костовска.
Настанот, како што е објавено на социјалните мрежи, ќе има инклузивен карактер, а на него ќе настапат Мијата, Космонаутко и славејчињата, Беира Беки Салифоска и Леон Мемиш Апостоловски. За содржината и пораките на сликовницата, со авторот и илустраторката ќе разговара издавачот Дејан Трајкоски.
Сликовницата е во издание на Прозарт медиа и претставува продолжение на претходната „Другарко“, а овојпат главниот лик е Другарка, на која ѝ се придружуваат Другарко и двете мачиња – Рони и Бони. Заедно со нивниот фантазмобил, тие патуваат низ светови полни со љубов, разбирање и пријателство.
„Ова е една од ретките сликовници кај нас која се занимава со децата со нетипичен развој и носи пораки за инклузија и прифаќање“, велат од Прозарт медиа, кои ги покануваат децата и родителите да се приклучат на ова волшебно патување.
Издавањето на сликовницата е поддржано од Зегин, Шпаркасе Банка, Министерството за култура, Сити Флауерс и Дата Понс, а промоцијата се реализира во соработка со Домот на култура „Билјана Беличанец“ – Кисела Вода.
Ј. Ѓ.
