Од околу два часа колку што е сега потребно да се стигне од Ресен до грчката општина Преспа, со новиот граничен премин Маркова нога – Лемос, чија изградба и официјално започна од двете страни на границата, времето за патување ќе се намали на 40 минути, јави дописничката на МИА од Атина.
Работите во проектот БорПрес2 од македонска страна официјално започнаа во март, додека, пак, вчера во општина Преспа беше означен почетокот и на грчка страна, со настанот „Гранична станица Преспанско Езеро: Воспоставување на граничен премин меѓу Грција и Република Северна Македонија на областа Преспанско Езеро“, на кој присуствуваа министрите за внатрешни работи на двете земји Панче Тошковски и Теодорос Ливаниос, амбасадорот на ЕУ во земјава Михалис Рокас, како и претставници на локалните самоуправи.
Поради вчерашниот 24-часовен штрајк на новинарите во Грција, грчките медиуми, пред сè оние од северниот дел на земјата, денеска објавија за отпочнувањето на работите во Преспа.
Македонската делегација, заедно со амбасадорот Рокас, пеш ја поминале границата и пристигнале на настанот во Прeспа.
ЕУ амбасадорот во изјава за локалните медиуми, рекол дека е важен, историски ден, но и дека за него е чест што е првиот што ја помина границата.
– Ова е програма финансирана од ЕУ и се надеваме дека, пред сè, ќе ја унапредиме комуникацијата на народите, но и да ја заштитиме Преспа, езерото што е светското наследство во биодиверзитетот. Верувам дека ќе помогне во туризмот, во комуникациите, ќе помогне во трговските размени и навистина сум среќен што сум првиот кој ја преминува границата. Се надевам дека за година и пол до две ќе го направиме тоа официјално, истакна Рокас за весникот „Ихос“ од Лерин.
Министерот за внатрешни работи на Грција Теодорос Ливаниос за истиот весник нагласи дека станува збор за многу важен проект за економијата на Преспа.
– Во текот на годинава изведувачите ќе започнат со работа и се надевам во рок од две години проектот ќе биде завршен и да им биде предаден на жителите на Преспа, но и на посетителите за да уживаат во убавините на областа, истакна Ливаниос.
Додаде дека не станува збор за лесен проект, бидејќи, како што објасни, за изградбата на патот требале да бидат земени предвид многу еколошки параметри за заштита на животната средина.
Неговиот македонски колега, министерот Панче Тошковски, како што вчера објави МИА, посочи дека „ова не е само почеток на инфраструктурен проект, туку реализација на заедничка визија – визија вкоренета во регионалната соработка, европската интеграција и трајното партнерство меѓу нашите две држави“.
– Силата на Европа лежи во нејзиното единство и во мостовите што ги градиме преку границите – а не во ѕидовите што ги подигаме меѓу нас. Преку проектот БорПрес2, ја претвораме таа цел во практично, мерливо влијание. Овој проект е доказ дека европската интеграција не е далечна аспирација – тоа е жив процес, вкоренет во опипливи резултати: подобри патишта, безбедни граници и подобрен квалитет на живот за граѓаните на кои им служиме, потенцираше Тошковски, кој на маргините на вчерашниот настан оствари и билатерална средба со грчкиот министер Теодорос Ливаниос на која разговарале за меѓусебната соработка, како и можно решение за побрз проток на патници и стоки на граничниот премин Богородица – Евзони.
Во проектот БорПрес2 вреден над 7,7 милиони евра, 80 отсто финансиран преку ИПА 3 програмата на Европската Унија се планирани реновирање на постојната полициска станица од македонска страна, изградба на нова зграда за царинска и полициска контрола на страна на Грција и развој на прекуграничната пешачка патека помеѓу селата Брајчино и Агиос Германос со цел промоција на еко-туризмот.
Партнери во проектот се министерствата за внатрешни работи на двете земји, грчкиот регион Западна Македонија и општините Ресен и Преспа.
Целта на БорПрес2 е целосно оперативно функционирање на преминот, согласно со Шенген стандардиτе, зајакнување на поврзаноста, безбедноста и регионалниот развој во Преспанскиот регион.
Проектот започна на 14 февруари 2025 година и е планирано да трае 36 месеци, со завршување на 13 февруари 2028 година.
Граничниот премин Маркова нога-Лемос, кој функционираше со децении, олеснувајќи ја комуникацијата меѓу жителите од двете стани на границата беше затворен во мај 1967 година за време на хунтата во Грција, а повторното отворање беше континуирано барање на локалното население.
