Стотина полицајци се распоредени од ноќеска пред Собранието на Нови Сад каде утрово имаше тензии кога полицијата почна да ги турка граѓаните собрани во блокадата. Еден студент е повреден, а друг беше приведен. Полицијата интервенираше за вработените да влезат во зградата.
Околу 6 часот утрово, полицијата ги оттурна собраните демонстранти пред Собранието на Нови Сад, за да можат претставниците на локалните власти да влезат внатре. Како што објави ТВ Нова, еден студент е повреден, а еден е приведен. Повредениот студент беше однесен со амбулантно возило.
Студентите во блокада доцна синоќа ги повикаа граѓаните да дојдат пред Собранието на Нови Сад во голем број и да ја поддржат блокадата на зградата на градскиот парламент. Седницата е закажана за денеска во 10 часот наутро. Студентите потсетуваат дека доколку закажаната седница не се одржи денеска, во градот ќе биде воведена принудна администрација, што значи дека локалните избори ќе мора да се одржат во следните два месеца.
„Значи, ако успееме да ги спречиме да влезат во собранието… ќе имаме избори за локалните заедници. Ние, граѓаните на Нови Сад, се прашуваме“, објавија тие на социјални мрежи пред блокадата.
Студентите од неколку факултети во Нови Сад, исто така, повикаа на блокада.
