Европската комисија го информираше Советот на министри на Босна и Херцеговина дека оваа земја ќе добие 10 проценти помалку пари од Планот за раст за Западен Балкан, односно 108,5 милиони евра помалку, бидејќи не ја доставила конечната верзија на Агендата за реформи, дознава Радио Слободна Европа (RSE) од извор во Европската Унија, пишува РСЕ на српски јазик.
Доколку Босна и Херцеговина не ја достави Агендата за реформи до 30 септември, според истиот извор, ЕУ дополнително ќе ги намали средствата за уште 10 проценти.
Босна и Херцеговина сè уште не ја доставила агендата за реформи до Европската Унија, која би ѝ донела на БиХ една милијарда евра од програмата на Европската Унија, во рамките на Планот за раст за Западен Балкан.
Реформската агенда е список на социо-економски реформи, кои властите на БиХ не можат да ги усвојат повеќе од една година, бидејќи министрите од Алијансата на независни социјалдемократи на Милорад Додик не сакаат да усвојат неколку закони, тврдејќи дека тие ја пренесуваат надлежноста на ентитетот на државата.
На 27 јуни, Советот на министри на Босна и Херцеговина го усвои Нацрт-листата на реформи и Нацрт-агендата за реформи со сите коментари добиени од членовите на Работниот тим.
На телефонската седница, надлежните министерства во Советот на министри на БиХ беа задолжени, заедно со сите надлежни министерства од другите нивоа на власт, да продолжат со активностите за усогласување на коментарите, со цел финализирање на текстот на Реформската агенда, се вели во соопштението, пишува РСЕ.
Секоја земја од Западен Балкан имаше обврска да достави реформска агенда до Брисел.
Станува збор за исполнување на неколку критериуми, поврзани со почитување на принципите на владеење на правото, демократија, институционална реформа и спречување на корупција и судир на интереси, како и преземање на потребните чекори за да се обезбеди дека средствата нема да бидат злоупотребени.
Планот за раст за Западен Балкан е најамбициозниот финансиски пакет на Европската Унија, вреден шест милијарди евра, кој има за цел да го удвои економскиот раст во тие земји во следните десет години.
Планот го опфаќа периодот од 2024 до 2027 година.
Д. Т. / Цивил Медиа
