Американскиот претседател Доналд Трамп денеска изјави дека три нуклеарни локалитети во Иран се целосно уништени и дека обновата на овие локалитети ќе трае со години.
-Сите три нуклеарни локалитети во Иран се целосно уништени и/или збришани. Ќе бидат потребни години за да се вратат во функција и, ако Иран сака, би било многу подобро за нив да почнат одново, на три различни локалитети, пред да бидат уништени и тие локалитети, ако одлучат да го сторат тоа, рече Трамп на својата мрежа Truth Social.
Американскиот лидер постојано тврди дека три клучни ирански нуклеарни локалитети биле целосно уништени во нападот на САД во јуни.
Според американските разузнавачки извори, само една од трите целни локалитети, Фордоу, претрпела сериозна штета. Според Ен-Би-Си Њуз, нападите погодиле површински објекти, додека подземните објекти, како што се центрифуги и објекти за складирање збогатен ураниум, претрпеле минимална штета или биле преместени пред нападот.
Трамп ги отфрли извештаите како „лажни вести“ и ги обвини медиумите дека го потценуваат успехот на нападот.
Иран потврди значителна штета на објектот во Фордо, но не издаде официјално соопштение за состојбата на другите објекти.
Меѓународната агенција за атомска енергија (МААЕ) соопшти дека е прерано да се процени вкупната штета и дека ќе бидат потребни дополнителни инспекции за да се утврди влијанието на нападот врз нуклеарната програма на Иран.
