Кандидатот на ВРЕДИ за градоначлник на Општина Чаир, Изет Меџити на денешната прес конференција го претстави првиот основен столб на неговата изборна програма, детален план за целосна модернизација на патната инфраструктура и конечното решавање на проблемот со паркирањето во Чаир.
Меџити во своето обраќање истакна дека Чаир ќе биде модерна, уредена и функционална општина, каде што, како што рече, секојдневниот живот на граѓаните ќе биде полесен и поквалитетен. Според него, најголемата инвестиција во историјата на Чаир ќе се реализира во областа на паркирањето, со конкретни проекти што ќе го олеснат животот на жителите.
-Нашата визија е јасна, Чаир ќе стане модерна, уредена и функционална општина, место каде што секојдневниот живот на граѓаните е олеснет, а не отежнат. Затоа, во следните четири години, нашиот фокус ќе биде на капитални проекти што носат ред, безбедност и европски стандарди. Нема да има импровизации, туку системски решенија. Имаме владина одлука и отворена набавка за изградба на подземна гаража на две нивоа под плоштадот „Скендербег“, со капацитет од 800 возила и површина од над 12.500 метри квадратни. Ова ќе го ослободи централното јадро, ќе овозможи нормално функционирање и ќе ја зголеми вредноста на Чаршијата, изјави Меџити.
Тој најави дека ќе се изградат и катни гаражи на пет клучни локации, кај комплексот „Чаирчанка“, во населбата „Саук Чешме“, во „Топанско поле“ (близу големиот паркинг), на булеварот „Никола Карев“ и кај салата „Партизан“.
Во вториот дел од презентацијата, кандидатот на ВЛЕН за градоначалник на Општина Чаир, Изет Меџити најави широка офанзива за изградба и реконструкција на патишта, со цел Чаир да добие модерна и безбедна инфраструктура за пешаци, велосипедисти и возила.
Меѓу најзначајните проекти, според него, се проширувањето на улицата „Цветан Димов“ во булевар со шест ленти и велосипедски патеки, проширување на булеварот „Мит’хат Фрашери“, поврзувањето на улицата „Џон Кенеди“ со булеварот „Никола Карев“, што ќе создаде нов коридор за сообраќај, изградба на булеварите „Хрватска“ и „Црна Гора“ кои ќе го олеснат движењето од Автокоманда кон Сарај, како и изградба на кружен тек во Гази Баба, во близина на парк шумата Гази Баба, кај Природно-математичкиот факултет.
Меџити го претстави и планот за целосна реконструкција на улиците во неколку важни маала на општината.
-Во Топаана се завршува улицата „Максут Садик“ и се продолжува со други проекти, во Стариот Чаир ќе се реконструираат улиците „Парашќеви Кирјази“, „Дервиш Хима“, „Емин Дураку“ и „Струмичка“; во Топанско поле ќе се реконструираат улиците „Ферид Мурати“, „Исмаил Ќемали“, „Мехмет Гега“ и „Методија Митевски“, како и целосна реконструкција на големиот паркинг со површина од 2.150 м²; додека во „Тенеке Маало“ ќе се изврши целосна реконструкција на улиците 1, 3, 5, 7, 9 и 20. Ќе воспоставиме ред и европски стандарди. Ќе има целосно ново јавно
осветлување и подземни електрични инсталации во Стариот Чаир и Топанско Поле за поголема безбедност и модерен изглед. Ќе работиме на систематизација на еднонасочните улици, нагласи тој.
Меџити потенцира дека оваа програма е резултат на директна соработка со граѓаните и содржи конкретни решенија, а не, како што рече празни ветувања.
