Мониторинг тимот на ЦИВИЛ, во рамки на набљудувањето на локалните избори 2025, констатира повеќе случаи на злоупотреба на (сопствените) деца и малолетници за време на предизборната кампања од речиси сите кандидати во трката за градоначалник. Децата станаа реквизит во трката за градоначалник. Политички поени на грбот на најмладите.
Кандидатот за градоначалник на Куманово од редовоте на СДСМ, Мартин Костовски ги внесе малолетните ќерки во изборната кампања. Тој на својот Фејсбук профил објави фотографии на кои се гледа дека неговите ќерки нацртале цртеж за негова политичка поддршка. Во објавените цртежи малолетните деца ги напишале пораката од кампањата на СДСМ „Се бориме за нашиот дом“ и бројот на избирачкото ливче на партијата.
,,Најголема поддршка од мои ќерке рано сабајле, идемо у нов дн у нову победу”, напиша Костовски.
Реакциите не изостанаа – дел од медиумите и социјалните мрежи го отворија прашањето за границата меѓу родителство и политичка злоупотреба.
Порталот Expres.mk во објавата за злоупотреба на деца на Костовски на нивната Фејсбук страница додале коментар – „Меѓаши се слушаме ли – Ќе му помогне ли на кандидатот тоа што своите деца ги внесе во изборна политичка трка од најмала возраст“?
На социјалната платформа Х, профилот Робусна акција објави: Експрес, порталот на Горан Момировски шеф на Кабинет на Баба Гога, ги повикува Меѓаши да реагираат зошто Мартин објавил цртеж кој го насликале неговите ќерки. Дали вака реагираше за Орце и зошто не? Иако според мене нема ништо спорно и во двата случаи, чисто да ви доволам какви куртони се вмровските партали а уште повеќе нивните газди.
Кандидатот за градоначалник на Град Скопје од редовите на ВМРО-ДПМНЕ, Орце Ѓоргиевски, на 5 октомври објави фотографија со неговиот син со коментар: Од теренските активности, малку заслужен одмор со мојот најголем извор на енергија, синот Ведран.
Инаку, според Импресиумот на Expres.mk издавач на порталот е Друштво за медиуми, комуникации и услуги ЕКСПРЕС МЕДИА ГРУП ДООЕЛ Скопје, а Горан Момироски е редовен колумнист и соработник (од 17 Мај 2017 до 15 Мај 2024 година).
Исто така, на 5 октомври, носителката на советничката листа за Град Скопје на Левица, Катерина Јовановска, на својот Фејсбук профил објави: „Само што ни пријде на штанд детенце од 3-4 годинки и ни вика “Знаете ли дека татко ми ќе гласа за вас”. Па нема поубаво чувство кога си цензуриран, а сепак си виден“.
Иако во овој случај детето не било директно вклучено во кампања, примерот покажува колку лесно малолетниците стануваат дел од политички наративи. Да не беше изборна кампања, каде што се е дозволено, нели, за глас повеќе, сигурно твитер заедницата ќе си правеја хе-хенца со хаштаг #НеСеСлучило или #НеСеДесило.
ЦИВИЛ смета дека ова претставува двојна злоупотреба, најпрво на јавната функција, а потоа и на децата кои, иако не смеат да бидат дел од политички активности, се појавуваат во партиски објави.
Преземено: Цивил Медиа
