Израелскиот министер за одбрана Израел Кац денеска објави дека им наредил на Израелските одбранбени сили (ИДФ) да постават физички маркери по должината на таканаречената „жолта линија“ во Појасот Газа – територијата на која ИДФ се повлече како дел од сегашниот прекин на огнот со Хамас.
Кац рече дека маркерите јасно ќе ја обележат границата на израелската воена контрола и ќе послужат како предупредување до Хамас и жителите на Газа дека „секое кршење или обид за преминување на линијата ќе биде одговорено со оган“, објави „Тајмс оф Израел“.
„Жолтата линија“ опфаќа околу 53 проценти од територијата на Газа, претежно надвор од урбаните области.
Иако ИДФ не ја држи целата зона со копнени трупи, граничната линија често се користи за проценка на безбедносната состојба и понатамошно распоредување на силите.
Канцеларијата на Кац објави слика од маркер што личи на сините буриња што се користат за означување на „Сината линија“ меѓу Израел и Либан.
Во потенцијалните идни фази од договорот за прекин на огнот, израелската војска дополнително ќе ги повлече своите трупи од Појасот Газа.
