Претседателот на СДА Македонија, Џелал Хоџиќ, остро реагираше на најновите случувања поврзани со одбележувањето на настан што, според него, во македонската историографија се оценува како почеток на српската окупација над Вардарска Македонија.
„Овој настан, во сред Северна Македонија, се одбележува во присуство на вицепремиер во македонска влада, заедно со рускиот амбасадор во државата“, напиша Хоџиќ на социјалните мрежи.
Тој посочи дека молкот на институциите и политичките актери е симптоматичен:
„А имате молк од ‘дежурните’ патриоти во македонската политичка елита. Имате молк кај мејнстрим медиумите кои секој ден ја бранат државата од Бугарија, Албанците и од ‘внатрешните предавници’. Имате молк од македонската олигархија, за економските последици од изолацијата на државата од ЕУ, а интеграцијата во ‘српскиот свет’. Молк, цензура, како во најцрните денови на комунизмот!“
Хоџиќ ги обвини и медиумите и политичките структури за игнорирање на предупредувањата од европските извештаи за српското влијание:
„Имате молк од сите пропагандисти и ботови кои со месеци на сите телевизии, весници, радија и портали го релативизираа европскиот извештај во кој влијанието на ‘српскиот свет’ беше спомнато во негативен контекст.“
Според него, „власта на ВМРО-ДПМНЕ и Мицкоски не смее да зуцне на продуцентите на големосрпските наративи кои Северна Македонија ја претставуваат како Стара Србија“.
Хоџиќ потсети и на честите јавни појавувања на рускиот амбасадор во земјава:
„Руската амбасада годинава се има појавено на повеќе одбележувања на датуми во Куманово, отколку што цела Влада на Северна Македонија има усвоено реформски закони кои не доближуваат до ЕУ.“
Тој предупреди дека наративите за „разочараност од ЕУ“ се дел од поширока стратегија:
„Додека паралелно оди наративот ‘ЕУ не нѐ сака’, ‘ЕУ нема да се проширува’, ‘Бирократите од ЕУ…’, ‘ЕУ ќе се распадне’… очигледно е дека македонската политичка елита, македонската олигархија и македонските мејнстрим медиуми ја припремаат македонската јавност за откажување од патот кон ЕУ и интеграција во ‘српскиот свет’.“
Хоџиќ заврши со иронична забелешка:
„Очекувано е кога во Подгорица и Тирана ќе има прослава за членство во ЕУ на Албанија и Црна Гора, за во Скопје ќе се спрема прослава со Цеца за ‘реинтеграцијата на Јужна Бановина во српскиот свет’.“
