Бензините од ноќеска на полноќ поскапуваат за половина денар по литар, а цената на дизел горивото ЕУРОДИЗЕЛ БС (Д-Е V) се зголемува за еден денар, одлучи денеска Регулаторната комисија за енергетика, водни услуги и услуги за управување со комунален отпад (РКЕ). Со одлуката се врши зголемување на малопродажните цени на нафтените деривати во просек за 1,03 отсто.
Новата малопродажна цена на ЕУРОСУПЕР БС – 95 е 74 денари за литар, ЕУРОСУПЕР БС – 98 ќе се продава за 76, а ЕУРОДИЗЕЛ БС (Д-Е V) за 71 денар за литар. Цената на Екстра лесното масло за горење (ЕЛ-1) не се менува и останува 69,5 денари за литар. Со одлуката на РКЕ за 0,856 денари за килограм се зголемува и малопродажната цена на Мазутот М-1 НС и ќе изнесува 36,913 денари.
Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат зголемувањекај бензините во просек за 2,849 отсто, кај дизелот за 2,319 и кај мазутот за 3,433 отсто, додека кај екстра лесното масло има намалување за 0,05 проценти. Курсот на денарот во однос на доларот по кој беа формирани цените со претходната пресметка е понизок за 0,0034 отсто.
